കൊച്ചി: നെടുമ്പാശ്ശേരിയിൽ അമിതവേഗതയിലെത്തിയ മിനി കൂപ്പർ ഇടിച്ച് മൂന്ന് സ്കൂട്ടർ യാത്രികർ കൊല്ലപ്പെട്ട കേസിൽ 19-കാരനായ പ്രതി സുഹൈലിനെ സംഭവസ്ഥലത്തെത്തിച്ച് പോലീസ് വിശദമായ തെളിവെടുപ്പ് നടത്തി. ഒരു ദിവസത്തെ കസ്റ്റഡി ലഭിച്ച പ്രതിയെ ഇന്ന് വൈകിട്ട് അഞ്ച് മണിക്ക് കോടതിയിൽ ഹാജരാക്കേണ്ടതിനാൽ, അതിനുമുമ്പായി പരമാവധി തെളിവുകൾ ശേഖരിക്കാനുള്ള ശ്രമത്തിലാണ് അന്വേഷണസംഘം.

എറണാകുളം റൂറൽ എസ്പിയുടെ മേൽനോട്ടത്തിൽ ആലുവ ഡിവൈഎസ്പി ബൈജു കെ. പൗലോസിനാണ് കേസന്വേഷണത്തിന്റെ ചുമതല. ക്വിക്ക് റെസ്‌പോൺസ് ടീമിന്റെ (QRT) ശക്തമായ കാവലോടെയാണ് വിവിധയിടങ്ങളിൽ പ്രതിയുമായുള്ള തെളിവെടുപ്പ് പുരോഗമിക്കുന്നത്.

തെളിവെടുപ്പിന് എത്തിക്കുമ്പോൾ തിരിച്ചറിയാൻ സാധിക്കാത്ത വിധം മുടി പറ്റെ വെട്ടിയ നിലയിലായിരുന്നു സുഹൈൽ. ബോർസ്റ്റൽ ഹോമിലുണ്ടായിരുന്ന ട്രിമ്മർ ഉപയോഗിച്ച് പ്രതി സ്വയം മുടി മുറിക്കുകയായിരുന്നുവെന്നും തങ്ങളല്ല ഇത് ചെയ്തതെന്നും ഹോം അധികൃതർ വ്യക്തമാക്കി.