കാസർകോട്: മുഖ്യമന്ത്രിയുടെ സോഷ്യൽ മീഡിയ കോർഡിനേറ്ററാണെന്ന് അവകാശപ്പെട്ട വ്യക്തി ഉൾപ്പെടെ പിടിയിലായ കാസർകോട്ടെ ലഹരിക്കടത്ത് കേസിൽ പിടിച്ചെടുത്ത കാർ ഉടമയ്ക്ക് തിരികെ വിട്ടുനൽകാൻ ജില്ലാ സെഷൻസ് കോടതി ഉത്തരവിട്ടു. 139 ഗ്രാം എംഡിഎംഎ കടത്താൻ ഉപയോഗിച്ച വാഹനം വെറും രണ്ടു മാസത്തിനകം വിട്ടുകിട്ടാൻ ഇടയാക്കിയത് പോലീസിന്റെ ഭാഗത്തുനിന്നുണ്ടായ ഒത്തുകളിയും ഗുരുതര വീഴ്ചയുമാണെന്ന ആരോപണം ശക്തമായിട്ടുണ്ട്.
കാലിക്കടവിൽ വെച്ച് പോലീസ് പിടിച്ചെടുത്ത കാർ എറണാകുളം അറക്കപ്പടി സ്വദേശിയായ ആഷിക്കിന്റെ ഉടമസ്ഥതയിലുള്ളതാണ്. തനിക്ക് കേസിൽ നേരിട്ട് പങ്കില്ലെന്ന് ചൂണ്ടിക്കാട്ടി ആഷിക് നൽകിയ വിട്ടുകിട്ടൽ ഹർജിയെ കോടതിയിൽ എതിർക്കുന്നതിൽ പോലീസ് പരാജയപ്പെട്ടു; വാഹനം തിരികെ നൽകിയാൽ വീണ്ടും കുറ്റകൃത്യത്തിന് ഉപയോഗിച്ചേക്കാം എന്നൊരു ദുർബല വാദം മാത്രമാണ് പോലീസ് റിപ്പോർട്ടിൽ ഉൾപ്പെടുത്തിയിരുന്നത്.
കാർ ഉടമയും പ്രതികളും തമ്മിലുള്ള ബന്ധത്തെക്കുറിച്ചോ, ഈ വാഹനം മുൻപും ലഹരിക്കടത്തിന് ഉപയോഗിച്ചിട്ടുണ്ടോ എന്നതിനെക്കുറിച്ചോ യാതൊരു അന്വേഷണ വിവരങ്ങളും നൽകാതെയാണ് പോലീസ് റിപ്പോർട്ട് സമർപ്പിച്ചത്. കേസിൽ നേരിട്ട് പങ്കാളിത്തമില്ലെന്ന നിരീക്ഷണത്തിലാണ് വാഹനം ഉടമയ്ക്ക് തിരിച്ചുനൽകാൻ കോടതി ഉത്തരവിട്ടത്.
