കൊച്ചി: നെടുമ്പാശ്ശേരിയിൽ മൂന്നുപേരുടെ ജീവനെടുത്ത മിനി കൂപ്പർ അപകടത്തിന്റെ പശ്ചാത്തലത്തിൽ, സംസ്ഥാനത്തെ റോഡ് സുരക്ഷയിലും വാഹനങ്ങളുടെ അമിതവേഗതയിലും അതീവ ആശങ്ക പ്രകടിപ്പിച്ച് കേരള ഹൈക്കോടതി ഡിവിഷൻ ബെഞ്ച്. അപകടമുണ്ടാക്കിയ പത്തൊമ്പതുകാരൻ സുഹൈൽ സജീവ് മണിക്കൂറിൽ 200 കിലോമീറ്റർ വേഗതയിലാണ് കാറോടിച്ചതെന്ന് എഐ ക്യാമറ ദൃശ്യങ്ങളിൽ വ്യക്തമാണെന്ന് കോടതി ചൂണ്ടിക്കാട്ടി.
രാത്രികാലങ്ങളിൽ 100 മുതൽ 150 കിലോമീറ്ററിലധികം വേഗതയിൽ പായുന്ന ആഡംബര-ഹൈപെർഫോമൻസ് കാറുകൾ പെട്ടെന്ന് ബ്രേക്ക് ചെയ്താലും നിൽക്കില്ലെന്നിരിക്കെ, വേഗത ഒരിക്കലും ഡ്രൈവർമാർക്ക് ഒരു പ്രോത്സാഹനമായി മാറരുതെന്ന് കോടതി വ്യക്തമാക്കി. അമിതവേഗത കണ്ടെത്തുന്നതിന് നിലവിലെ ട്രാഫിക് ക്യാമറകൾ പര്യാപ്തമാണോയെന്നും ഉടനടി നിയമനടപടി സ്വീകരിക്കാൻ സംവിധാനമുണ്ടോയെന്നും ആരാഞ്ഞ ബെഞ്ച്, ഇതിനായി വിദഗ്ധ സംഘത്തെ നിയോഗിച്ച് പുതിയ സംവിധാനം രൂപീകരിക്കണമെന്നും ആവശ്യപ്പെട്ടു.
നിരന്തര കോടതി ഇടപെടലുകൾ ഉണ്ടായിട്ടും കാര്യമായ മാറ്റം ഉണ്ടാകാത്ത സാഹചര്യത്തിൽ സർക്കാരിന്റെ ഔപചാരിക മറുപടിയല്ല ആവശ്യമെന്നും, പ്രായോഗിക പരിഹാരം വ്യക്തമാക്കി ഗതാഗതവകുപ്പ് 10 ദിവസത്തിനകം വിശദീകരണം നൽകണമെന്നും കോടതി അന്ത്യശാസനം നൽകി.
