തിരുവനന്തപുരം: ശബരിമല ദർശനത്തിനായുള്ള വെർച്വൽ ക്യൂ ബുക്കിംഗ് ഫീസ് നിലവിലെ അഞ്ച് രൂപയിൽ നിന്ന് പത്ത് രൂപയായി ഇരട്ടിയാക്കാൻ തിരുവിതാംകൂർ ദേവസ്വം ബോർഡ് തലത്തിൽ ധാരണയായി. നിരക്ക് വർധന നടപ്പാക്കുന്നതിന് ബോർഡ് ഹൈക്കോടതിയുടെ അനുമതി തേടും.
പമ്പയിലെ ശുചിമുറികൾ തീർത്ഥാടകർക്ക് പൂർണ്ണമായും സൗജന്യമായി ഉപയോഗിക്കാൻ സൗകര്യമൊരുക്കുന്നതിനാണ് ഈ അധിക തുക ഈടാക്കുന്നതെന്നാണ് അധികൃതരുടെ വിശദീകരണം. നിരക്ക് ഉയർത്തുന്നത് പരാതികൾക്ക് വഴിവെച്ചേക്കുമെന്ന് ഭരണസമിതിയിൽ ആശങ്ക ഉയർന്നുവെങ്കിലും, ഭക്തർക്ക് കൂടുതൽ പ്രയോജനം ചെയ്യുന്ന നടപടിയാണിതെന്ന നിലപാടാണ് ബോർഡ് പ്രസിഡന്റ് കെ. ജയകുമാർ സ്വീകരിച്ചത്.
സന്നിധാനത്തെ തിരക്ക് നിയന്ത്രിക്കുന്നതിനായി ഓൺലൈൻ വഴി നേരത്തെ ദർശനം ബുക്ക് ചെയ്യാൻ ഏർപ്പെടുത്തിയ സംവിധാനമാണ് വെർച്വൽ ക്യൂ. ഇതുവരെ അഞ്ച് രൂപ മാത്രമായിരുന്ന ഈ ഓൺലൈൻ ബുക്കിംഗ് സേവന നിരക്കാണ് പുതിയ നിർദ്ദേശത്തിലൂടെ പത്ത് രൂപയായി ഉയർത്താൻ ഒരുങ്ങുന്നത്.
