തിരുവനന്തപുരം: കേന്ദ്ര-സംസ്ഥാന സർക്കാരുകളുടെ ഔദ്യോഗിക അനുമതിയില്ലാതെ ചെക്ക് റിപ്പബ്ലിക്കിലെ പ്രാഗ് സന്ദർശിച്ച സംഭവത്തിൽ മന്ത്രി കെ.എം. ഷാജിക്കെതിരെ കേന്ദ്ര സർക്കാർ അന്വേഷണം തുടങ്ങി. സന്ദർശനത്തിന്റെ യാത്രാ ഉദ്ദേശ്യവും ക്രിമിനൽ കേസുകളിലെ പ്രതികളുടെ സാന്നിധ്യവും കേന്ദ്ര രഹസ്യാന്വേഷണ വിഭാഗം പരിശോധിക്കുകയാണെന്നും ഇതിന്റെ പ്രാഥമിക വിവരങ്ങൾ ശേഖരിച്ചുകഴിഞ്ഞതായും അധികൃതർ അറിയിച്ചു.
ഓസ്ട്രിയ, ബൾഗേറിയ, സ്വിറ്റ്സർലൻഡ്, യുഎഇ എന്നീ നാല് രാജ്യങ്ങളിൽ യാത്ര ചെയ്യാനായിരുന്നു മന്ത്രിക്ക് മുൻകൂട്ടി അനുമതി ലഭിച്ചിരുന്നത്. എന്നാൽ സെപ്റ്റംബർ 16 മുതൽ 26 വരെയുള്ള യൂറോപ്യൻ സന്ദർശനത്തിനിടെ അദ്ദേഹം പ്രാഗിലേക്ക് പോവുകയായിരുന്നു.
അനുമതിയില്ലാതെ ചെക്ക് റിപ്പബ്ലിക്കിൽ എത്തിയ മന്ത്രി ഒന്നിലധികം ദിവസം അവിടെ തങ്ങിയെന്നാണ് സൂചന. വ്യത്യസ്ത ദിവസങ്ങളിൽ എടുത്ത ചിത്രങ്ങൾ അദ്ദേഹം തന്നെ സമൂഹമാധ്യമങ്ങളിൽ പങ്കുവെച്ചതോടെയാണ് ഇക്കാര്യം വ്യക്തമായത്.
