കൊച്ചി: മൂന്ന് പേരുടെ മരണത്തിനിടയാക്കിയ നെടുമ്പാശ്ശേരി വാഹനാപകടക്കേസിലെ എഫ്ഐആർ സംബന്ധിച്ച വിവാദങ്ങളിൽ വിശദീകരണവുമായി എറണാകുളം റൂറൽ എസ്പി കെ.എസ്. സുദർശൻ. അപകടം നടന്ന ഉടനെ പുലർച്ചെ ലഭ്യമായ മൊഴികളുടെ അടിസ്ഥാനത്തിലാണ് പ്രാഥമിക എഫ്ഐആർ രജിസ്റ്റർ ചെയ്തതെന്നും, ആ സമയത്ത് പ്രതി മദ്യപിച്ചതായി മൊഴികൾ ലഭിച്ചിരുന്നില്ലെന്നും അദ്ദേഹം വ്യക്തമാക്കി. അതേസമയം, കേസിൽ കുറ്റകരമായ നരഹത്യാ വകുപ്പ് ചുമത്തിയിട്ടുണ്ടെന്നും പ്രതി മദ്യപിച്ചിരുന്നു എന്ന കാര്യം റിമാൻഡ് റിപ്പോർട്ടിൽ വ്യക്തമായി രേഖപ്പെടുത്തിയിട്ടുണ്ടെന്നും പോലീസ് അറിയിച്ചു.
പ്രതിയെ ജയിലിലേക്ക് വിടാതെ ബോർസ്റ്റൽ സ്കൂളിലേക്ക് അയച്ചതിൽ പോലീസിന് പങ്കില്ലെന്നും പ്രതികളെ എവിടെ റിമാൻഡ് ചെയ്യണമെന്ന് തീരുമാനിക്കുന്നത് കോടതിയാണെന്നും എസ്പി വ്യക്തമാക്കി. കേസിൽ നാല് പ്രതികളെയും കസ്റ്റഡിയിൽ വാങ്ങുമെന്നും ഇവരുടെ കസ്റ്റഡി അപേക്ഷ നാളെ പരിഗണിക്കുമെന്നും പറഞ്ഞ പോലീസ്, പ്രതികളുടെ ലഹരി പരിശോധനാഫലം ഇന്നോ നാളെയോ ലഭ്യമാകുമെന്നും കൂട്ടിച്ചേർത്തു.
എഫ്ഐആറിൽ പ്രതിയുടെ പേരുവിവരങ്ങളോ മദ്യപിച്ച വിവരങ്ങളോ ഉൾപ്പെടുത്താതെ പോലീസ് പ്രതിയെ സംരക്ഷിക്കാൻ ശ്രമിച്ചുവെന്ന് പ്രതിപക്ഷമുൾപ്പെടെ വലിയ വിമർശനം ഉന്നയിക്കുകയും, സ്റ്റേഷനിലേക്ക് ഡിവൈഎഫ്ഐ മാർച്ച് സംഘടിപ്പിക്കുകയും ചെയ്ത പശ്ചാത്തലത്തിലാണ് പോലീസിന്റെ വിശദീകരണം.
