തിരുവനന്തപുരം: കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ) സംസ്ഥാനത്തെ വിവിധ സഹകരണ ബാങ്കുകളിൽ നടത്തിയ പരിശോധനകളിൽ നിർണായക രേഖകളും ഡിജിറ്റൽ തെളിവുകളും പിടിച്ചെടുത്തതായി എൻഫോഴ്സ്മെന്റ് ഡയറക്ടറേറ്റ്. കൊച്ചി, കോഴിക്കോട് ഇഡി യൂണിറ്റുകൾ ചേർന്ന് എറണാകുളം, തൃശൂർ, കോഴിക്കോട് ജില്ലകളിലെ മൂന്ന് ബാങ്കുകളിലായിരുന്നു പരിശോധന നടത്തിയത്. ആകെ 550 കോടിയോളം രൂപ ഉൾപ്പെട്ട 27 സഹകരണ സംഘം തട്ടിപ്പ് കേസുകളിലാണ് നിലവിൽ കേന്ദ്ര ഏജൻസിയുടെ അന്വേഷണം പുരോഗമിക്കുന്നത്.
അങ്കമാലി അർബൻ സഹകരണ ബാങ്കുമായി ബന്ധപ്പെട്ട് നടത്തിയ പരിശോധനയിൽ വ്യാജ വായ്പ ഇടപാടുകളുടെ രേഖകളും മൊബൈൽ ഫോണുകളും ഉൾപ്പെടെ 38 വസ്തുവകകളുടെ രേഖകളും ഡിജിറ്റൽ ഉപകരണങ്ങളും പിടിച്ചെടുത്തു. ഇതിനുപുറമെ, 1.82 കോടി രൂപ നിക്ഷേപമുണ്ടായിരുന്ന രണ്ട് ഫിക്സഡ് ഡെപ്പോസിറ്റ് അക്കൗണ്ടുകൾ മരവിപ്പിച്ചതായും ഇഡി വാർത്താക്കുറിപ്പിൽ അറിയിച്ചു.
തെന്നല ബാങ്ക് തട്ടിപ്പുകേസിൽ 24.50 ലക്ഷം രൂപയുടെ 20 സ്ഥിരനിക്ഷേപ അക്കൗണ്ടുകളാണ് ഇഡി മരവിപ്പിച്ചത്. കുട്ടനെല്ലൂർ ബാങ്കിലെ പിഎംഎൽഎ കേസുമായി ബന്ധപ്പെട്ട് പ്രതികൾക്ക് വായ്പ അനുവദിച്ചതിന്റെ പ്രധാന രേഖകളും പരിശോധനയിൽ അന്വേഷണ സംഘം കണ്ടെടുത്തു.
