കൊച്ചി: കളമശ്ശേരി കൂട്ടബലാത്സംഗ കേസിലെ മുഖ്യപ്രതി ശ്രീരാജ് സ്പായിൽ ജോലി വാഗ്ദാനം ചെയ്ത് കൂടുതൽ യുവതികളെ ഇന്റർവ്യൂവിനായി ക്ഷണിച്ചിരുന്നതായി പോലീസ് കണ്ടെത്തി. ശ്രീരാജിന്റെ മൊബൈൽ ഫോൺ പരിശോധിച്ചതിൽ നിന്ന് ലഭിച്ച നിർണ്ണായക ചാറ്റുകളുടെ അടിസ്ഥാനത്തിൽ 15 യുവതികളുടെ വിവരങ്ങൾ അന്വേഷണ സംഘം ശേഖരിച്ചു. ഇവർ ലൈംഗികാതിക്രമത്തിന് ഇരയായിട്ടുണ്ടോയെന്ന് പരിശോധിക്കുമെന്നും, ഇവരിൽ നിന്ന് വിവരങ്ങൾ ശേഖരിച്ച് പരാതിയുണ്ടെങ്കിൽ കേസെടുത്ത് മുന്നോട്ടുപോകുമെന്നും പോലീസ് വ്യക്തമാക്കി.
കേസിലെ പ്രതികളുടെയും ഇടപ്പള്ളിയിലെ സ്പായുടെയും ബാങ്ക് അക്കൗണ്ടുകൾ മരവിപ്പിക്കാനുള്ള നടപടികളിലേക്ക് പോലീസ് കടന്നു. അറസ്റ്റിലായ ശരണ്യയ്ക്ക് പുറമെ സ്പായിലെ മറ്റ് ജീവനക്കാരുടെ പശ്ചാത്തലത്തെക്കുറിച്ചും വിശദമായ അന്വേഷണം നടത്തും.
സ്പായിൽ മാനേജർ തസ്തിക വാഗ്ദാനം ചെയ്ത് അഭിമുഖം നടത്തിയ ശേഷം യുവതിയെ ഇടപ്പള്ളിയിലെ ലോഡ്ജിലേക്ക് വിളിച്ചുവരുത്തിയാണ് കൂട്ടബലാത്സംഗത്തിന് ഇരയാക്കിയത്. മാനസികാഘാതത്തെ തുടർന്ന് ആശുപത്രിയിൽ ചികിത്സയിൽ കഴിയുന്ന യുവതിയുടെ മൊഴി ഇന്നലെ തൃക്കാക്കര എസിപിയുടെ നേതൃത്വത്തിലുള്ള പ്രത്യേക സംഘം രേഖപ്പെടുത്തിയിരുന്നു. അറസ്റ്റിലായ നാല് പ്രതികളെയും തിരിച്ചറിഞ്ഞ അതിജീവിത, അമ്മു എന്നറിയപ്പെടുന്ന ശരണ്യ ഉൾപ്പെടെയുള്ളവർ തന്നെ ക്രൂരമായ ലൈംഗിക പീഡനത്തിന് ഇരയാക്കിയതായി മൊഴി നൽകിയിട്ടുണ്ട്.
