തിരുവനന്തപുരം: പ്രതിപക്ഷ ഉപനേതാവ് സ്ഥാനം വേണമെന്ന നിലപാടിൽ നിന്ന് യാതൊരു കാരണവശാലും പിന്നോട്ടില്ലെന്ന് സിപിഐ സംസ്ഥാന സെക്രട്ടറി ബിനോയ് വിശ്വം ആവർത്തിച്ചു. ഇതൊരു വലിയ പദവിയായത് കൊണ്ടല്ല ആവശ്യമുന്നയിച്ചതെന്നും, കൂട്ടായ്മയും പങ്കുവയ്ക്കലും പരസ്പര ഐക്യവും മുൻനിർത്തിയുള്ള ഉറച്ച രാഷ്ട്രീയ നിലപാടിന്റെ ഭാഗമായാണ് തീരുമാനമെന്നും അദ്ദേഹം വ്യക്തമാക്കി.
എൽഡിഎഫ് മുന്നണി രാഷ്ട്രീയത്തിന്റെ ശരികളെക്കുറിച്ച് സിപിഐക്ക് വ്യക്തമായ ബോധ്യമുണ്ടെന്നും, ആ കാഴ്ചപ്പാടോടെയാണ് പിഎംശ്രീ അടക്കമുള്ള വിഷയങ്ങളിൽ പാർട്ടി കർശന നിലപാട് സ്വീകരിച്ചതെന്നും അദ്ദേഹം ഓർമ്മിപ്പിച്ചു. മുന്നണിയിൽ പുതിയൊരു പ്രവർത്തനശൈലിയും പുത്തൻ രാഷ്ട്രീയ സംസ്കാരവും രൂപപ്പെടേണ്ടത് കാലഘട്ടത്തിന്റെ അനിവാര്യതയാണെന്നും ബിനോയ് വിശ്വം ചൂണ്ടിക്കാട്ടി.
