തൃശ്ശൂർ: തൃശ്ശൂരിലെ തിരഞ്ഞെടുപ്പ് പ്രചാരണ ഘട്ടത്തിൽ നൽകിയ വാഗ്ദാനങ്ങൾ മറന്ന കേന്ദ്രമന്ത്രി സുരേഷ് ഗോപിയെ വിശ്വസിക്കരുതെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. സുരേഷ് ഗോപി ജയിച്ചാൽ എയിംസ് വരുമെന്നതായിരുന്നു അന്നത്തെ പ്രധാന പ്രചാരണമെന്നും, ഇപ്പോൾ അതൊക്കെ വിഴുങ്ങി മറവി നടിക്കുകയാണെന്നും അദ്ദേഹം കുറ്റപ്പെടുത്തി. താടി വെച്ചാൽ ആളുകൾക്ക് മറവി വരുമോ എന്നും, കേരളത്തിന്റെ ആരോഗ്യ നേട്ടങ്ങളെ അംഗീകരിക്കാൻ തയ്യാറാകാത്ത കേന്ദ്ര സർക്കാർ അവകാശപ്പെട്ട എയിംസ് നിഷേധിക്കുകയാണെന്നും ബിനോയ് വിശ്വം ചൂണ്ടിക്കാട്ടി.
അതേസമയം, തിരഞ്ഞെടുപ്പ് പ്രചാരണവേളയിൽ താൻ എയിംസ് വരുമെന്ന് പറഞ്ഞിട്ടില്ലെന്ന വിശദീകരണവുമായി സുരേഷ് ഗോപി രംഗത്തെത്തി. തിരഞ്ഞെടുപ്പ് സമയത്ത് തനിക്ക് താടി ഉണ്ടായിരുന്നില്ലെന്നും ക്ലീൻ ഷേവായാണ് പ്രചാരണം നടത്തിയതെന്നും പറഞ്ഞ അദ്ദേഹം, പിന്നീട് താടി വെച്ച ശേഷമുള്ള തന്റെ പ്രതികരണങ്ങളാണ് ഇപ്പോൾ പ്രചാരണ സമയത്തേതെന്ന രീതിയിൽ കാണിക്കുന്നതെന്നും വാദിച്ചു.
എങ്കിലും കേരളത്തിൽ എയിംസ് വന്നില്ലെങ്കിൽ അടുത്ത തവണ താൻ വോട്ട് ചോദിച്ച് ജനങ്ങൾക്ക് മുന്നിൽ എത്തില്ലെന്നും സുരേഷ് ഗോപി വ്യക്തമാക്കി.
