പാലക്കാട്: പിഎംശ്രീ സ്‌കൂൾ പദ്ധതിയിലും വിവാദ മദ്യനയത്തിലും സ്വീകരിച്ച കർക്കശ നിലപാടുകളിലൂടെ എൽഡിഎഫിനെയും ഒപ്പം സിപിഐഎമ്മിനെയും പ്രതിസന്ധിയിൽ നിന്ന് കരകയറ്റിയത് സിപിഐയാണെന്ന് സംസ്ഥാന സെക്രട്ടറി ബിനോയ് വിശ്വം. ആർഎസ്എസ് അജണ്ടയായ പിഎംശ്രീക്ക് കൂട്ടുനിൽക്കില്ലെന്ന് സിപിഐ വ്യക്തമാക്കിയതുകൊണ്ടാണ് എൽഡിഎഫിന് ഇന്ന് തലയുയർത്തി നിൽക്കാൻ സാധിക്കുന്നതെന്നും, ഇല്ലെങ്കിൽ മുന്നണിയെ സിപിഐഎം പണയപ്പെടുത്തുമായിരുന്നുവെന്നും പാലക്കാട് ജില്ലാ പ്രവർത്തക യോഗം ഉദ്ഘാടനം ചെയ്ത് സംസാരിക്കവെ അദ്ദേഹം പറഞ്ഞു. ഒടുവിൽ തങ്ങളുടെ നിലപാടാണ് ശരിയെന്ന് സിപിഐഎം കേന്ദ്ര നേതൃത്വത്തിന് തന്നെ സമ്മതിക്കേണ്ടി വന്നതായും അദ്ദേഹം ഓർമ്മിപ്പിച്ചു.
പട്ടാമ്പിയിലെ തിരഞ്ഞെടുപ്പ് വിജയത്തിന് പിന്നിൽ സിപിഐഎമ്മിന്റെ പൂർണ്ണ പിന്തുണയുണ്ടെന്ന് വ്യക്തമാക്കിയ ബിനോയ് വിശ്വം, സംഘടന ശക്തമല്ലാത്ത മേഖലയിലും വിജയിക്കാൻ സാധിച്ചതിൽ മുഹമ്മദ് മുഹ്സിന്റെ മികവുണ്ടെന്നും പ്രശംസിച്ചു. അതേസമയം, സംഘടനാ അടിത്തറയുണ്ടായിട്ടും മണ്ണാർക്കാട് പരാജയപ്പെട്ടത് സ്ഥാനാർത്ഥി നിർണ്ണയത്തിലെ പാളിച്ച മൂലമാണെന്ന് അദ്ദേഹം സ്വയംവിമർശനം നടത്തി.
