തൃശ്ശൂർ: കേരളത്തിൽ എയിംസ് (AIIMS) തീർച്ചയായും സ്ഥാപിക്കപ്പെടുമെന്ന് ആവർത്തിച്ച് കേന്ദ്രമന്ത്രി സുരേഷ് ഗോപി. പദ്ധതി സംബന്ധിച്ച ഔദ്യോഗിക പ്രഖ്യാപനം ഉണ്ടാകാതെ ഇനിയൊരു തെരഞ്ഞെടുപ്പിൽ താൻ ജനങ്ങളോട് വോട്ട് ചോദിച്ചെത്തില്ലെന്നും അദ്ദേഹം വ്യക്തമാക്കി. അതേസമയം, 2024-ൽ താൻ മത്സരിച്ചപ്പോൾ നൽകിയ തെരഞ്ഞെടുപ്പ് വാഗ്ദാനമല്ല എയിംസ് എന്നും, തെരഞ്ഞെടുപ്പ് വേളയിൽ എയിംസ് കൊണ്ടുവരുമെന്ന് താൻ എവിടെയും പറഞ്ഞിട്ടില്ലെന്നും അദ്ദേഹം അവകാശപ്പെട്ടു.
താൻ നടത്തിയ ഏതെങ്കിലും ഒരു പ്രസംഗത്തിലെങ്കിലും ഇത്തരമൊരു പരാമർശം ഉള്ളതായി തെളിയിക്കാൻ സാധിക്കുമോയെന്ന് അദ്ദേഹം രാഷ്ട്രീയ എതിരാളികളെ വെല്ലുവിളിച്ചു. തന്റെ വാക്കുകളോ സ്വപ്നങ്ങളോ തെറ്റിയിട്ടില്ലെന്നും, തെരഞ്ഞെടുപ്പ് കാലത്തെ പ്രസ്താവനകളിൽ ഇപ്പോഴും ഉറച്ചുനിൽക്കുകയാണെന്നും അദ്ദേഹം കൂട്ടിച്ചേർത്തു.
എയിംസ് അനുവദിക്കുന്നതിനുള്ള യോഗ്യത കൈവരിക്കാൻ സംസ്ഥാനം ആദ്യം 5 അനുയോജ്യമായ സ്ഥലങ്ങൾ നിർദ്ദേശിക്കുകയോ വ്യക്തമാക്കുകയോ ചെയ്യണമായിരുന്നുവെന്നും എന്നാൽ കേരളത്തിൽ നിന്ന് അത്തരം നീക്കങ്ങൾ ഉണ്ടായിട്ടില്ലെന്നും അദ്ദേഹം ചൂണ്ടിക്കാട്ടി. കേന്ദ്രസർക്കാർ സുപ്രീംകോടതിയിൽ വ്യക്തമാക്കിയത് എയിംസ് അനുവദിക്കുന്നതിലെ മുൻഗണനാക്രമത്തെക്കുറിച്ചാണ്. സംസ്ഥാനം ഭൂമി നിർദ്ദേശിക്കാൻ വൈകുന്നതിനനുസരിച്ച് പദ്ധതി യാഥാർത്ഥ്യമാകുന്നതിലും കാലതാമസം നേരിടുമെന്ന് സുരേഷ് ഗോപി ഓർമ്മിപ്പിച്ചു.
