തിരുവനന്തപുരം: വാഹനങ്ങളിൽ നിയമവിരുദ്ധമായി നടത്തുന്ന രൂപമാറ്റങ്ങൾ തടഞ്ഞ് ട്രാൻസ്പോർട്ട് കമ്മീഷണർ ജി. സ്പർജൻ കുമാർ കർശന ഉത്തരവിറക്കി. ആർടിഒയുടെ മുൻകൂർ അനുമതിയോടെ ഏഴ് കാര്യങ്ങളിൽ മാത്രമേ മാറ്റങ്ങൾ വരുത്താൻ അനുവാദമുള്ളൂവെന്നും ഇവ കൃത്യമായി ആർസി ബുക്കിൽ രേഖപ്പെടുത്തണമെന്നും ഉത്തരവിൽ വ്യക്തമാക്കുന്നു. മുൻകൂർ അനുമതിയില്ലാതെ രൂപമാറ്റം വരുത്തുന്ന വാഹനങ്ങൾക്കെതിരെ മോട്ടോർ വാഹന നിയമപ്രകാരം കർശന നടപടി സ്വീകരിക്കും.
നിരോധിത നിറങ്ങളൊഴികെ വാഹനത്തിന്റെ നിറം മാറ്റുന്നതിനും അംഗീകൃത കിറ്റുകൾ ഉപയോഗിച്ച് ഇന്ധന രീതി മാറ്റുന്നതിനും പ്രൊപ്പൽഷൻ സിസ്റ്റം കൺവേർഷനും അനുമതിയുണ്ട്. അതേ നിർമ്മാതാക്കളുടെ സമാന ശേഷിയുള്ള പുതിയ എൻജിൻ ഘടിപ്പിക്കാമെങ്കിലും എൻജിൻ സ്വാപ്പിംഗ് പൂർണ്ണമായി നിരോധിച്ചു.
സമാന മോഡലിലുള്ള പുതിയ ഷാസി ഉപയോഗിക്കാൻ സാധിക്കുമെങ്കിലും മറ്റ് വാഹനങ്ങളുടെ ഷാസി മാറ്റിവെക്കാൻ പാടില്ല. ഭിന്നശേഷിക്കാർക്ക് ഉപയോഗിക്കാവുന്ന രീതിയിലുള്ള മാറ്റങ്ങൾ വരുത്താനും ഇളവുണ്ട്. ഈ രൂപമാറ്റങ്ങളെല്ലാം നിർമ്മാതാക്കൾ, ഡീലർമാർ, അല്ലെങ്കിൽ സർക്കാർ അംഗീകൃത വർക്ക്ഷോപ്പുകൾ മുഖേന മാത്രമേ നിർവ്വഹിക്കാവൂ എന്നും ഉത്തരവിൽ നിഷ്കർഷിക്കുന്നു.
