തിരുവനന്തപുരം: സംസ്ഥാനത്തെ സാമൂഹ്യക്ഷേമ പെൻഷൻ അർഹതാ മാനദണ്ഡങ്ങളിൽ ഇളവുകൾ പ്രഖ്യാപിച്ച് തദ്ദേശ സ്വയംഭരണ വകുപ്പ്. വീടുകളിൽ എയർ കണ്ടീഷണർ ഉള്ളതും 1000 സിസിയിൽ താഴെയുള്ള ചെറുവാഹനങ്ങൾ സ്വന്തമായുള്ളതും ഇനി പെൻഷൻ ലഭിക്കുന്നതിന് തടസ്സമാകില്ല. പുതിയ പരിഷ്കരണത്തിലൂടെ കൂടുതൽ ഗുണഭോക്താക്കൾക്ക് ക്ഷേമപെൻഷൻ ആനുകൂല്യം ലഭ്യമാകും.
രോഗികൾ ഉൾപ്പെടെയുള്ളവരുടെ ആവശ്യങ്ങൾക്കായി പല വീടുകളിലും എയർ കണ്ടീഷണറുകൾ സ്ഥാപിക്കാറുണ്ട്. കൂടാതെ, പ്രധാനമായും ചെറുകാറുകളും ഓട്ടോറിക്ഷകളും ഉൾപ്പെടുന്ന 1000 സിസിയിൽ താഴെയുള്ള വാഹനങ്ങൾ ഉള്ളതിന്റെ പേരിൽ കുടുംബങ്ങളിലെ വയോജനങ്ങൾക്ക് പെൻഷൻ നിഷേധിക്കപ്പെടുന്ന സാഹചര്യം വ്യാപകമായ പരാതികൾക്കിടയാക്കിയിരുന്നു. ഈ രണ്ട് നിബന്ധനകളും മാനദണ്ഡങ്ങളിൽ നിന്ന് ഒഴിവാക്കണമെന്ന ശക്തമായ ജനകീയ ആവശ്യം പരിഗണിച്ചാണ് സർക്കാരിന്റെ ഇപ്പോഴത്തെ തീരുമാനം.
