തിരുവനന്തപുരം: വേതന വർദ്ധനവ് ആവശ്യപ്പെട്ട് കരാർ മീറ്റർ റീഡർമാർ നടത്തുന്ന സമരം ഏഴാം ദിവസത്തിലേക്ക് പ്രവേശിച്ചതോടെ കർശന നടപടിയുമായി വൈദ്യുതി വകുപ്പ്. ഇന്ന് ഉച്ചയ്ക്ക് മുൻപായി കയ്യിലുള്ള പിഒഎസ് (POS) മെഷീനുകൾ തിരിച്ചേൽപ്പിക്കാത്ത ജീവനക്കാരുടെ വിവരങ്ങൾ ഉടൻ പോലീസ് സ്റ്റേഷനുകളിൽ പരാതിയായി നൽകാൻ എല്ലാ സെക്ഷൻ ഓഫീസുകൾക്കും മാനേജ്‌മെന്റ് നിർദ്ദേശം നൽകി. കഴിഞ്ഞ ദിവസം സമരക്കാരുമായി കെഎസ്ഇബി നടത്തിയ ചർച്ച പരാജയപ്പെട്ടിരുന്നു.

നഗരമേഖലകളിൽ ഒരു മീറ്റർ റീഡിംഗിന് അഞ്ച് രൂപയും ഗ്രാമപ്രദേശങ്ങളിലെ വീടുകളിൽ റീഡിംഗ് എടുക്കുന്നതിന് ഏകദേശം 13 രൂപയുമാണ് തങ്ങൾക്ക് ലഭിക്കുന്നതെന്ന് ജീവനക്കാർ ചൂണ്ടിക്കാട്ടുന്നു. ഈ തുക യാത്രാച്ചിലവിന് പോലും തികയുന്നില്ലെന്നും നിലവിൽ മാസം ശരാശരി 23,000 രൂപ മാത്രമാണ് സമ്പാദിക്കാൻ കഴിയുന്നതെന്നും ഇവർ വ്യക്തമാക്കുന്നു. പ്രതിസന്ധിയിൽ വൈദ്യുതി വകുപ്പ് മന്ത്രിയുടെ അടിയന്തര ഇടപെടലുണ്ടാകുമെന്ന പ്രതീക്ഷയിലാണ് സമരത്തിലുള്ളവർ.