കാസർകോട്: രാജ്യത്തിന്റെ സ്വാതന്ത്ര്യസമര ചരിത്രം തിരുത്തിയെഴുതണമെന്നും 1905-ൽ നടന്ന ബംഗാൾ വിഭജനവിരുദ്ധ പ്രക്ഷോഭവുമായി കോൺഗ്രസിന് യാതൊരു ബന്ധവുമില്ലെന്നും ആർഎസ്എസ് നേതാവ് ജെ. നന്ദകുമാർ. കാസർകോട് കേന്ദ്ര സർവകലാശാലയിൽ വന്ദേമാതരവുമായി ബന്ധപ്പെട്ട് സംഘടിപ്പിച്ച സെമിനാറിൽ മുഖ്യപ്രഭാഷണം നടത്തവെയായിരുന്നു അദ്ദേഹത്തിന്റെ പരാമർശം. കാമ്പസിൽ ഇദ്ദേഹത്തിന്റെ പങ്കാളിത്തത്തിനെതിരെ വിദ്യാർത്ഥികളുടെ കടുത്ത പ്രതിഷേധം നിലനിൽക്കുന്നതിനിടെയായിരുന്നു പരിപാടി അരങ്ങേറിയത്.
കശ്മീർ മുതൽ കന്യാകുമാരി വരെയുള്ള പ്രക്ഷോഭങ്ങളെ യഥാർത്ഥത്തിൽ നയിച്ചത് വന്ദേമാതരമായിരുന്നുവെന്ന് അദ്ദേഹം വാദിച്ചു. എന്നാൽ ചരിത്രകാരന്മാർ 1947-ലെ സമരങ്ങളെ മാത്രമാണ് അതിതീവ്രമായി എടുത്തുകാണിക്കുന്നതെന്നും നന്ദകുമാർ കുറ്റപ്പെടുത്തി.
