തിരുവനന്തപുരം: വാടക ഹെലികോപ്റ്റർ സേവനത്തിനായി ചിപ്സൻ ഏവിയേഷനുമായുള്ള കരാർ ഇനി പുതുക്കില്ലെന്ന് സംസ്ഥാന സർക്കാർ ലോകായുക്തയെ അറിയിച്ചു. കെ.എം. ഷാജഹാൻ നൽകിയ ഹർജി പരിഗണിക്കവെ ചിപ്‌സന്റെ ഇൻവോയ്‌സ് ഹാജരാക്കിയ ഡയറക്ടർ ജനറൽ ഓഫ് പ്രോസിക്യൂഷൻ, മുഖ്യമന്ത്രിയുടെ മലപ്പുറം യാത്ര വ്യക്തിപരമായ ആവശ്യങ്ങൾക്കായിരുന്നില്ലെന്നും വ്യക്തമാക്കി. ഹർജിയിൽ തുടർനടപടികൾക്കായി കേസ് നവംബർ മൂന്നിലേക്ക് മാറ്റിവെച്ച ലോകായുക്ത, മുഖ്യമന്ത്രിക്കെതിരെ ഫയൽ ചെയ്തിരുന്ന മറ്റൊരു ഹർജി തള്ളി.
പുതിയ ടെണ്ടർ വിളിച്ചാൽ തുക വർധിക്കാൻ സാധ്യതയുള്ളതിനാൽ നിലവിലെ കരാർ തന്നെ നീട്ടണമെന്നായിരുന്നു മുൻപ് കാലാവധി പൂർത്തിയായപ്പോൾ ഡിജിപി ശുപാർശ ചെയ്തിരുന്നത്. കരാർ കഴിഞ്ഞതോടെ ആവശ്യാനുസരണം മണിക്കൂറിന് നാല് ലക്ഷം രൂപ നിരക്കിൽ ഹെലികോപ്റ്റർ നൽകാമെന്ന നിർദ്ദേശം ചിപ്സൻ മുന്നോട്ടുവെച്ചിരുന്നു.
