തിരുവനന്തപുരം: വേണാട് എക്‌സ്പ്രസിലെ കടുത്ത തിരക്കിനും യാത്രാദുരിതത്തിനും പരിഹാരമായി എറണാകുളം-കോട്ടയം-ചെങ്ങന്നൂർ വഴി കൊല്ലത്തേക്ക് പുതിയ ട്രെയിൻ സർവീസ് ആരംഭിക്കാൻ റെയിൽവേ മന്ത്രാലയത്തിൽനിന്ന് തത്വത്തിൽ അനുമതിയായതായി കൊടിക്കുന്നിൽ സുരേഷ് എംപി അറിയിച്ചു. യാത്രക്കാരുടെ കഷ്ടപ്പാടുകൾ വ്യക്തമാക്കുന്ന ചിത്രങ്ങളും ദൃശ്യങ്ങളും സഹിതം റെയിൽവേ മന്ത്രി അശ്വിനി വൈഷ്ണവിനെ നേരിൽക്കണ്ട് നടത്തിയ ചർച്ചകൾക്കൊടുവിലാണ് ഈ തീരുമാനം. മന്ത്രിയുടെ ഓഫീസിൽനിന്നുള്ള നിർദ്ദേശപ്രകാരം റെയിൽവേ ബോർഡ് തുടർനടപടികൾക്കായി സതേൺ റെയിൽവേ ചീഫ് പാസഞ്ചർ ട്രാൻസ്‌‌പോർട്ടേഷൻ മാനേജർക്ക് (സിപിടിഎം) ചുമതല കൈമാറിയിട്ടുണ്ട്.
ഓഫീസ് സമയം കഴിഞ്ഞ് എറണാകുളത്തുനിന്ന് കോട്ടയം, ചങ്ങനാശ്ശേരി, ചെങ്ങന്നൂർ, മാവേലിക്കര, കായംകുളം, കൊല്ലം ഭാഗങ്ങളിലേക്ക് പോകുന്ന സ്ഥിരം യാത്രക്കാരാണ് നിലവിലെ തിരക്കിൽ ഏറ്റവും കൂടുതൽ ബുദ്ധിമുട്ടുന്നത്. ഈ പ്രതിസന്ധിക്ക് പരിഹാരമായി വേണാട് എക്സ്പ്രസിന് തൊട്ടുമുൻപായി വൈകുന്നേരം നാല് മണിയോടെ എറണാകുളം ജംഗ്ഷനിൽനിന്ന് പുറപ്പെടുന്ന രീതിയിലാണ് പുതിയ സർവീസ് വിഭാവനം ചെയ്യുന്നത്. മെമു (MEMU) അല്ലെങ്കിൽ ഐസിഎഫ് (ICF) കോച്ചുകൾ ഉപയോഗിച്ച് സർവീസ് നടത്തുന്നതിനൊപ്പം ഈ ട്രെയിൻ കൊല്ലത്തുനിന്ന് പുനലൂരിലേക്ക് നീട്ടുന്നതിനുള്ള സാധ്യതകളും റെയിൽവേ സജീവമായി പരിശോധിക്കുന്നുണ്ടെന്ന് എംപി വ്യക്തമാക്കി.
