തിരുവനന്തപുരം: നാഷണൽ ഹെൽത്ത് മിഷനിൽ (എൻഎച്ച്എം) കഴിഞ്ഞ സർക്കാരിന്റെ ഭരണകാലത്ത് നിയമിതരായ താൽക്കാലിക കരാർ ജീവനക്കാരെ കൂട്ടത്തോടെ പിരിച്ചുവിടാൻ ആരോഗ്യവകുപ്പ് നടപടി തുടങ്ങി. ഇതിന്റെ ഭാഗമായി 2026 ജൂണിന് മുൻപ് തയ്യാറാക്കിയിട്ടുള്ള മുഴുവൻ അഭിമുഖ പട്ടികകളും റദ്ദാക്കാൻ നിർദ്ദേശിച്ച് ആരോഗ്യവകുപ്പ് പ്രിൻസിപ്പൽ സെക്രട്ടറി എൻഎച്ച്എം ഡയറക്ടർക്ക് അയച്ച ഉത്തരവ് പുറത്തുവന്നു. ഉത്തരവ് നടപ്പിലാകുന്നതോടെ എൻഎച്ച്എമ്മിലെ ആയിരക്കണക്കിന് കരാർ തൊഴിലാളികൾക്കാണ് ജോലി നഷ്ടപ്പെടാൻ പോകുന്നത്.
നേരത്തെ മൂന്ന് മാസത്തേക്ക് നീട്ടി നൽകിയിരുന്ന കരാർ കാലാവധി പൂർത്തിയായ സാഹചര്യത്തിലാണ് വകുപ്പിന്റെ ഈ അസാധാരണ നടപടി. പ്രവർത്തനഭാരവും നിലവിലെ ആവശ്യങ്ങളും കൃത്യമായി തിട്ടപ്പെടുത്തി പുതിയ റാങ്ക് ലിസ്റ്റ് തയ്യാറാക്കാനാണ് എൻഎച്ച്എമ്മിന് നൽകിയിരിക്കുന്ന നിർദ്ദേശം. കാര്യക്ഷമതയും യോഗ്യതയുമുള്ള പുതിയ ഉദ്യോഗാർത്ഥികളെ സർവീസിലേക്ക് കൊണ്ടുവരാനാണ് ഈ മാറ്റമെന്നാണ് ആരോഗ്യവകുപ്പ് നൽകുന്ന വിശദീകരണം.
