തിരുവനന്തപുരം: കോട്ടയം മെഡിക്കൽ കോളേജ് ആശുപത്രിയിൽ ചികിത്സാപ്പിഴവിനെ തുടർന്ന് രോഗി മരണപ്പെട്ടെന്ന പരാതിയിൽ ആരോഗ്യവകുപ്പ് അന്വേഷണം പ്രഖ്യാപിച്ചു. മൂന്നംഗ വിദഗ്ധ ഡോക്ടർമാരുടെ സമിതി സംഭവം പരിശോധിച്ച് ഒരാഴ്ചയ്ക്കകം റിപ്പോർട്ട് സമർപ്പിക്കണമെന്ന് മെഡിക്കൽ വിദ്യാഭ്യാസ വകുപ്പ് ഡയറക്ടർ നിർദ്ദേശം നൽകി. തിരുവനന്തപുരം മെഡിക്കൽ കോളേജിലെ സർജറി വിഭാഗം പ്രൊഫസർ ഡോ. തോമസ് പി.കെ., ഫോറൻസിക് വിഭാഗം എച്ച്ഒഡി ഡോ. ഷാരിജ, തൃശൂർ മെഡിക്കൽ കോളേജ് സർജറി വിഭാഗം പ്രൊഫസർ ഡോ. രവീന്ദ്രൻ എന്നിവരാണ് അന്വേഷണ സംഘത്തിലുള്ളത്.
ചങ്ങനാശ്ശേരി സ്വദേശിനിയായ ഹസീന ഹെർണിയ ചികിത്സയ്ക്കായി കഴിഞ്ഞ സെപ്റ്റംബർ 18-നാണ് കോട്ടയം മെഡിക്കൽ കോളേജിൽ എത്തുന്നത്. താക്കോൽദ്വാര ശസ്ത്രക്രിയ പൂർത്തിയാക്കി ഡിസ്ചാർജ് ചെയ്ത ഇവർ വീട്ടിലെത്തിയ ശേഷമുള്ള മൂന്ന് ദിവസങ്ങളിൽ കടുത്ത പനിയും മറ്റ് ശാരീരിക അസ്വസ്ഥതകളും പ്രകടിപ്പിച്ചു.
തുടർന്ന് വീണ്ടും കോട്ടയം മെഡിക്കൽ കോളേജിൽ പ്രവേശിപ്പിച്ച ഹസീനയെ അടിയന്തരമായി വയറുകീറിയുള്ള രണ്ടാമത്തെ ശസ്ത്രക്രിയക്ക് വിധേയയാക്കിയെങ്കിലും ചികിത്സയിലിരിക്കെ കഴിഞ്ഞ ദിവസം മരണം സംഭവിക്കുകയായിരുന്നു.
