കാസർകോട്: കാസർകോട് കേന്ദ്ര സർവകലാശാലയിൽ വന്ദേമാതരം സെമിനാറിലെ മുഖ്യ പ്രഭാഷകനായി ആർഎസ്എസ് സൈദ്ധാന്തികൻ ജെ. നന്ദകുമാറിനെ ക്ഷണിച്ചതിനെതിരെ വിദ്യാർത്ഥികളുടെ ശക്തമായ പ്രതിഷേധം. എസ്എഫ്ഐ, കെഎസ്‌യു, എംഎസ്എഫ്, എഐഎസ്എഫ് എന്നീ സംഘടനകൾ സംയുക്തമായാണ് സെമിനാർ വേദിയായ ഹാളിന് മുന്നിൽ ആർഎസ്എസ് വിരുദ്ധ മുദ്രാവാക്യങ്ങളുമായി ഉപരോധം തീർത്തത്. പ്രക്ഷോഭം നിയന്ത്രിക്കാൻ കാമ്പസിൽ വലിയ തോതിലുള്ള പോലീസ് കാവൽ ഏർപ്പെടുത്തിയിട്ടുണ്ട്.
സർവകലാശാലയിലെ ഭാഷാ വിഭാഗവുമായി സഹകരിച്ച് കേന്ദ്ര സാഹിത്യ അക്കാദമി നടത്തുന്ന സെമിനാറിൽ സ്വന്തം പഠനവകുപ്പിലെ വിദ്യാർത്ഥികളെ പോലും വിലക്കുകയാണെന്ന് പരാതി ഉയർന്നു. എബിവിപി, ആർഎസ്എസ് നേതൃത്വങ്ങളെ മാത്രം പങ്കെടുപ്പിച്ച് നടത്തുന്ന പരിപാടി കാമ്പസിനെ കാവിവൽക്കരിക്കാനുള്ള ആസൂത്രിത നീക്കമാണെന്ന് വിദ്യാർത്ഥികൾ ആരോപിച്ചു. പഠനവകുപ്പുകളിലെ സാധാരണ ക്ലാസുകൾ നിർത്തിവെച്ച് മുഴുവൻ പേരും സെമിനാറിൽ പങ്കെടുക്കണമെന്ന് നിർദ്ദേശിച്ചിരുന്നെങ്കിലും രജിസ്റ്റർ ചെയ്ത ഡെലിഗേറ്റുകളെപ്പോലും പോലീസ് തടയുകയായിരുന്നു.
ഡെലിഗേറ്റ് തിരിച്ചറിയൽ കാർഡുകൾ കൈവശമുള്ള വിദ്യാർത്ഥികളെ വൈസ് ചാൻസലറുടെ ഉത്തരവ് ചൂണ്ടിക്കാട്ടിയാണ് പോലീസ് തടഞ്ഞുവെച്ചത്. ഇതിനിടെ, വൻ പോലീസ് സുരക്ഷയിലാണ് ജെ. നന്ദകുമാറിനെ സംഘാടകർ വേദിയിലേക്ക് ആനയിച്ചതും വന്ദേമാതരം പൂർണ്ണമായി ആലപിച്ച് സെമിനാർ ആരംഭിച്ചതും. തുടർന്ന് വിദ്യാർത്ഥികളുമായി അനുരഞ്ജന ചർച്ചയ്ക്ക് എത്തിയ സ്റ്റുഡന്റ്സ് ഡീന് പ്രതിഷേധക്കാരുടെ ചോദ്യങ്ങൾക്ക് തൃപ്തികരമായ മറുപടി നൽകാൻ സാധിച്ചില്ല.
