പാലക്കാട്: സിപിഐഎം മുൻ ജില്ലാ സെക്രട്ടറി ഇ.എൻ. സുരേഷ് ബാബുവിനെതിരെ വനിതാ അഭിഭാഷക നൽകിയ പീഡന പരാതിയിൽ അന്വേഷണം ആവശ്യപ്പെട്ട് കോൺഗ്രസ് പാലക്കാട് ജില്ലാ പോലീസ് മേധാവിക്ക് പരാതി നൽകി. മുഖ്യമന്ത്രിയും സിപിഐഎം സംസ്ഥാന സെക്രട്ടറിയും പരാതി പൂഴ്ത്തിവെക്കുകയാണെന്ന് ആരോപിച്ച പാലക്കാട് ബ്ലോക്ക് കോൺഗ്രസ് കമ്മിറ്റി പ്രസിഡന്റ് സി.വി. സതീഷ്, ഇരയായ യുവതിക്ക് നീതി ലഭ്യമാക്കാൻ അടിയന്തര പോലീസ് ഇടപെടൽ വേണമെന്നും ആവശ്യപ്പെട്ടു.
വിഷയത്തിൽ സമഗ്ര അന്വേഷണം വേണമെന്ന ആവശ്യവുമായി ബിജെപിയും രംഗത്തെത്തിയിട്ടുണ്ട്. വേട്ടക്കാരനൊപ്പം നിൽക്കുന്ന നിലപാടാണ് സിപിഐഎം നേതൃത്വം സ്വീകരിക്കുന്നതെന്നും സുരേഷ് ബാബുവിനെതിരായ പരാതി പോലീസിന് കൈമാറാൻ പാർട്ടി തയ്യാറാകണമെന്നും ബിജെപി പാലക്കാട് ഈസ്റ്റ് ജില്ലാ അധ്യക്ഷൻ പ്രശാന്ത് ശിവൻ ആവശ്യപ്പെട്ടു. സിപിഐഎമ്മിന്റെ സൈബർ ആക്രമണം ഭയന്നാണ് യുവതി നിയമനടപടിക്ക് മടിക്കുന്നതെന്നും, പാർട്ടി ഓഫീസുകൾ പീഡന കേന്ദ്രങ്ങളായി മാറുന്ന സാഹചര്യം ജില്ലയിൽ ഇത് മൂന്നാം തവണയാണെന്നും അദ്ദേഹം ആരോപിച്ചു.
