പാലക്കാട്: മുൻ ജില്ലാ സെക്രട്ടറി ഇ.എൻ. സുരേഷ് ബാബുവിനെതിരെ പാർട്ടിക്ക് മുന്നിൽ പരാതിയൊന്നും ലഭിച്ചിട്ടില്ലെന്നും വിഷയം പാർട്ടി ചർച്ച ചെയ്തിട്ടില്ലെന്നും സിപിഐഎം സംസ്ഥാന കമ്മിറ്റി അംഗം എൻ.എൻ. കൃഷ്ണദാസ്. സുരേഷ് ബാബുവിനെ സ്ഥാനത്തുനിന്ന് മാറ്റിയതിന് പിന്നാലെ കടുത്ത നടപടിയെടുക്കാൻ സംസ്ഥാന നേതൃത്വത്തിന് മേൽ സമ്മർദ്ദം ശക്തമാകുന്നതിനിടെയാണ് അദ്ദേഹത്തിന്റെ പ്രതികരണം. സമൂഹത്തിൽ വൃത്തികെട്ട പാർട്ടികളായ കോൺഗ്രസും ബിജെപിയും തങ്ങളെ ഉപദേശിക്കാൻ വരേണ്ടതില്ലെന്ന് അദ്ദേഹം പറഞ്ഞു.
പരാതി ഉന്നയിച്ചതായി പറയപ്പെടുന്ന വനിതാ അഭിഭാഷകയുണ്ടെങ്കിൽ അവരെ പൊതുസമൂഹത്തിന് മുന്നിൽ ഹാജരാക്കുകയാണ് വേണ്ടതെന്ന് കൃഷ്ണദാസ് നിലപാടെടുത്തു. ആക്ഷേപങ്ങൾ മാധ്യമങ്ങളിലൂടെ ജനങ്ങളോട് തുറന്നുപറഞ്ഞ ശേഷം നേതാക്കളോട് അഭിപ്രായം ചോദിക്കുന്നതല്ലേ ഉചിതമെന്നും അദ്ദേഹം ചോദിച്ചു.
