കൊച്ചി: കളമശ്ശേരി കൂട്ടബലാത്സംഗ കേസിൽ നിലവിൽ പിടിയിലായവർക്ക് പുറമെ കൂടുതൽ പ്രതികൾ ഉൾപ്പെട്ടിട്ടുണ്ടെന്ന് അതിക്രമത്തിന് ഇരയായ യുവതിയുടെ ഭർത്താവ്. താൻ വീട്ടിൽ തിരിച്ചെത്തിയ വേളയിൽ ഭാര്യയ്ക്ക് എഴുന്നേറ്റു നിൽക്കാൻ പോലും ശേഷിയുണ്ടായിരുന്നില്ലെന്നും ഐസ്ക്രീമിൽ മയക്കുമരുന്ന് ചേർത്തുകൊടുത്താണ് പ്രതികൾ ക്രൂരമായ ലൈംഗികാതിക്രമം നടത്തിയതെന്നും അദ്ദേഹം വെളിപ്പെടുത്തി. രക്ഷപ്പെടാൻ ശ്രമിച്ചപ്പോൾ പ്രതികൾ തടയുകയും, മൊബൈൽ ഫോൺ പിടിച്ചുവെച്ച ശേഷം വധഭീഷണി മുഴക്കുകയും ചെയ്തു.
കടുത്ത പീഡനത്തെത്തുടർന്ന് ഗുരുതരമായ മാനസികാഘാതത്തിലായ യുവതി ഇപ്പോൾ പലരെയും തിരിച്ചറിയാൻ കഴിയാത്ത അവസ്ഥയിലാണ്. നേരത്തെ ഗർഭച്ഛിദ്രത്തിന് വിധേയയായ ശേഷം ആത്മഹത്യാ പ്രവണത കാണിച്ചിരുന്നതിനാൽ പൂർണ്ണ ശ്രദ്ധയോടെയാണ് ഭാര്യയെ പരിചരിച്ചിരുന്നതെന്നും ഭർത്താവ് പറഞ്ഞു. മുൻപുണ്ടായിരുന്ന ജോലി നഷ്ടപ്പെട്ടതിനെ തുടർന്ന് പുതിയ തൊഴിൽ അന്വേഷിക്കുന്നതിനിടെയാണ് സ്പായിൽ മാനേജർ തസ്തികയിലേക്കുള്ള ഇന്റർവ്യൂ സന്ദേശം വരുന്നത്. ട്രാവൽസ് സംബന്ധമായ ജോലിക്കായി താൻ യാത്രയിലായിരുന്ന സമയത്താണ് അഭിമുഖം പൂർത്തിയാക്കി ജോലി ലഭിച്ചെന്നു പറഞ്ഞ് യുവതിയെ കൊച്ചിയിലെ ലോഡ്ജിലേക്ക് വീണ്ടും വിളിച്ചുവരുത്തി കൂട്ടബലാത്സംഗം ചെയ്തതും ദൃശ്യങ്ങൾ പകർത്തിയതും.
പിറ്റേന്ന് രാവിലെ ബോധം വീണ്ടെടുത്തപ്പോഴാണ് അതിക്രമം നടന്ന വിവരം യുവതി മനസ്സിലാക്കിയത്. പരാതി നൽകാൻ സാധിക്കാത്ത മാനസികനിലയിലായിരുന്ന യുവതിയുടെ അവസ്ഥ കണ്ട് സുഹൃത്തുക്കൾ ഇടപെട്ടാണ് പോലീസിനെ സമീപിച്ചത്. സംഭവവുമായി ബന്ധപ്പെട്ട് ശ്രീരാഗ്, ജിത്തു എന്നീ പ്രതികളെ ഇതിനകം റിമാൻഡ് ചെയ്തിട്ടുണ്ട്.
കേസിൽ മറ്റൊരു യുവതിക്കും പങ്കുള്ളതായി കണ്ടെത്തിയിട്ടുണ്ട്. പ്രതികളിൽ ഒരാൾക്ക് നാല് സ്പാ കേന്ദ്രങ്ങളുള്ളതായി സൂചന ലഭിച്ച പശ്ചാത്തലത്തിൽ, ഇവർക്ക് മുൻകാല കുറ്റകൃത്യ പശ്ചാത്തലമോ സ്പായുടെ മറവിലുള്ള ലൈംഗിക വ്യാപാര ശൃംഖലയുമായി ബന്ധമോ ഉണ്ടോയെന്ന് പോലീസ് പരിശോധിക്കുന്നുണ്ട്. ഭീഷണിപ്പെടുത്താനാണ് ദൃശ്യങ്ങൾ ചിത്രീകരിച്ചതെന്നും സംഭവത്തിൽ ഉൾപ്പെട്ട മറ്റു പ്രതികൾക്കായുള്ള തിരച്ചിൽ ഊർജ്ജിതമാണെന്നും അന്വേഷണസംഘം അറിയിച്ചു.
