തൃശൂർ: സംസ്ഥാന കായിക മേളയ്ക്കിടെ പന്തൽ തകർന്നുവീണ സംഭവത്തിൽ നിർമ്മാണ തകരാറുകൾ വ്യക്തമാണെന്നും ഉദ്യോഗസ്ഥ തലത്തിൽ മുൻകരുതൽ വീഴ്ചകൾ ഉണ്ടായെന്നും കായിക വകുപ്പ് മന്ത്രി ഒ.ജെ. ജനീഷ്. സംഭവം നടന്ന് അഞ്ച് ദിവസങ്ങൾക്ക് ശേഷം തൃശൂർ അക്വാട്ടിക് കോംപ്ലക്സിലെ അപകടസ്ഥലം നേരിൽക്കണ്ട് വിലയിരുത്തിയ ശേഷം സംസാരിക്കുകയായിരുന്നു അദ്ദേഹം. വിഷയത്തിൽ സർക്കാർ തലത്തിൽ സമഗ്രമായ അന്വേഷണം നടത്തുമെന്നും മന്ത്രി വ്യക്തമാക്കി.
മഴയും ശക്തമായ കാറ്റും ഉണ്ടായിരുന്നുവെങ്കിലും ഒരു സാഹചര്യത്തിലും പന്തൽ നിലംപതിക്കാൻ പാടില്ലായിരുന്നുവെന്നും നിർമ്മാണത്തിലെ പാളിച്ചകൾ മറച്ചുവെക്കാനാകില്ലെന്നും മന്ത്രി ചൂണ്ടിക്കാട്ടി. അധ്യാപക സംഘടനകളുടെ ആഭിമുഖ്യത്തിലാണ് കായികമേളയുടെ തയ്യാറെടുപ്പുകൾ നടന്നതെന്നും, ഉദ്യോഗസ്ഥ തലത്തിൽ ചേർന്ന സംഘാടക സമിതി യോഗത്തിൽ എംഎൽഎ അടക്കമുള്ളവർ പങ്കെടുത്തതിനാൽ ജില്ലാതല ജനപ്രതിനിധികളെ ഇതിന്റെ ഭാഗമാക്കേണ്ട സാഹചര്യമില്ലായിരുന്നുവെന്നും അദ്ദേഹം വിശദീകരിച്ചു. മന്ത്രി സ്ഥലം സന്ദർശിക്കാൻ വൈകിയത് നേരത്തെ വലിയ ആക്ഷേപങ്ങൾക്ക് വഴിവെച്ചിരുന്നു.
നീന്തൽ, പവർ ലിഫ്റ്റിംഗ് മത്സരങ്ങൾ പുരോഗമിക്കുന്നതിനിടെ കാറ്റിലും മഴയിലും മേൽക്കൂരയിലെ ഷീറ്റുകൾ പറന്നുപോയാണ് പന്തൽ തകർന്നുവീണത്. അപകടത്തിൽ പത്തോളം വിദ്യാർത്ഥികൾ ഉൾപ്പെടെ നിരവധി പേർക്ക് പരിക്കേറ്റിരുന്നു.
