തിരുവനന്തപുരം: ബിജെപി നേതാവും കൗൺസിലറുമായ ആർ. ശ്രീലേഖയ്ക്ക് ചില ആരോഗ്യപ്രശ്നങ്ങൾ ഉണ്ടെന്ന് ബിജെപി സംസ്ഥാന ജനറൽ സെക്രട്ടറി എസ്. സുരേഷ്. ശാരീരിക അസ്വസ്ഥതകൾ മൂലം ഒരു ജനപ്രതിനിധി എന്ന നിലയിലുള്ള ചുമതലകൾ ശരിയായ രീതിയിൽ പൂർത്തിയാക്കാൻ സാധിക്കില്ലെന്ന ചിന്തയും ഉത്കണ്ഠയും മാത്രമാണ് അവർക്കുള്ളതെന്നും ഇക്കാര്യം പാർട്ടിയിലെ ബന്ധപ്പെട്ടവരുടെ ശ്രദ്ധയിൽപ്പെടുത്തുക മാത്രമാണ് ഉണ്ടായതെന്നും അദ്ദേഹം വ്യക്തമാക്കി. ശ്രീലേഖ കൗൺസിലർ സ്ഥാനം രാജിവെച്ചു എന്ന തരത്തിൽ പുറത്തുവരുന്ന വാർത്തകൾ വാസ്തവവിരുദ്ധമാണെന്ന് എസ്. സുരേഷ് പറഞ്ഞു. ഫേസ്ബുക്ക് കുറിപ്പിലൂടെ പ്രതികരിച്ച അദ്ദേഹം ആശുപത്രിയിൽ ശ്രീലേഖയെ സന്ദർശിച്ചതിന്റെ ചിത്രങ്ങളും പങ്കുവെച്ചു.
ശ്രീലേഖ മറ്റു രാഷ്ട്രീയ പ്രസ്ഥാനങ്ങളിലേക്ക് മാറുമെന്നോ പാർട്ടിയുമായി വിലപേശൽ നടത്തുകയാണെന്നോ ഉള്ള അഭ്യൂഹങ്ങൾ അടിസ്ഥാനരഹിതമാണ്. തിരുവനന്തപുരം നഗരസഭയിലെ ബിജെപി ഭരണം ഉടൻ നഷ്ടപ്പെടുമെന്ന് ചിലർ പ്രചരിപ്പിക്കുന്നുണ്ടെന്നും എന്നാൽ തിരുവനന്തപുരം കോർപ്പറേഷൻ തുടർന്നും ബിജെപി തന്നെ ഭരിക്കുമെന്നും സുരേഷ് കൂട്ടിച്ചേർത്തു.
കേരളത്തിലെ പ്രഥമ വനിതാ ഐപിഎസ് ഉദ്യോഗസ്ഥയും ഡിജിപിയുമായിരുന്ന ശ്രീലേഖയെ കെ. സുരേന്ദ്രനാണ് ബിജെപിയിലേക്ക് സ്വീകരിച്ചത്. അന്നുമുതൽ പാർട്ടി പ്രതിബദ്ധത പൂർണ്ണമായി കാത്തുസൂക്ഷിക്കാൻ അവർക്ക് സാധിച്ചിട്ടുണ്ട്. നിലവിൽ ബിജെപി സംസ്ഥാന വൈസ് പ്രസിഡന്റ് എന്ന ചുമതല മികച്ച രീതിയിലാണ് അവർ കൈകാര്യം ചെയ്യുന്നത്. പാർട്ടി നിർദ്ദേശിച്ചപ്പോൾ നഗരസഭയിലേക്ക് കൗൺസിലർ സ്ഥാനാർത്ഥിയായി മത്സരിക്കാൻ അവർ മുന്നോട്ടുവന്നത് തന്നെ പ്രസ്ഥാനത്തോടുള്ള കൂറിന്റെ തെളിവാണെന്ന് സുരേഷ് ഓർമ്മിപ്പിച്ചു.
പാർട്ടി സംഘടിപ്പിച്ച മൂന്ന് ദിവസത്തെ ജില്ലാതല പഠനശിബിരത്തിൽ ഒരു സാധാരണ പ്രവർത്തകയെപ്പോലെയാണ് അവർ മുഴുവൻ സമയവും പങ്കെടുത്തത്. അഴിമതിക്കെതിരെ നിരന്തരം ശബ്ദമുയർത്തിയിട്ടുള്ള അവർക്ക് അനധികൃത സമ്പാദ്യങ്ങളൊന്നുമില്ല. സ്വന്തം പെൻഷൻ തുക വിനിയോഗിച്ചാണ് അവർ വാർഡിലെ ജനങ്ങൾക്ക് വേണ്ടിയുള്ള പ്രവർത്തനങ്ങൾ നടത്തുന്നത്. പരമ്പരാഗതമായ രാഷ്ട്രീയ ശൈലിയുള്ള ആളല്ല ശ്രീലേഖയെന്നും, അവരൊരു സ്ത്രീയും അമ്മയുമാണെന്നും ചൂണ്ടിക്കാട്ടിയ സുരേഷ്, അവർ എപ്പോഴും ജനസേവന രംഗത്ത് തുടരുമെന്നും വ്യക്തമാക്കി.
