തിരുവനന്തപുരം: യൂണിവേഴ്സിറ്റി ഹോസ്റ്റലിലുണ്ടായ സംഘർഷവുമായി ബന്ധപ്പെട്ട് ഉയർന്ന വിവാദങ്ങളിൽ കന്റോൺമെന്റ് എസ്എച്ച്ഒ സതീഷിനെതിരെ സിറ്റി പോലീസ് കമ്മീഷണറുടെ താക്കീത്. എസ്എച്ച്ഒയെ നേരിട്ട് വിളിച്ചുവരുത്തിയാണ് കമ്മീഷണർ നിലപാട് അറിയിച്ചത്. ഫേസ്ബുക്കിൽ പോസ്റ്റിട്ടതുൾപ്പെടെയുള്ള വിഷയങ്ങളിൽ കമ്മീഷണർ തന്റെ കടുത്ത അതൃപ്തി വ്യക്തമാക്കി. കൂടാതെ, എസ്എഫ്ഐ ജില്ലാ സെക്രട്ടറിയെ ഭീഷണിപ്പെടുത്തിയെന്ന പരാതി നേരിടുന്ന എസ്ഐ ഗോകുലിനെതിരെയും അച്ചടക്ക നടപടിയുണ്ടാകാൻ സാധ്യതയുണ്ട്.
അതേസമയം, ഈ വിഷയത്തിൽ നിയമപോരാട്ടവുമായി മുന്നോട്ടുപോകാനാണ് എസ്എഫ്ഐയുടെ തീരുമാനം. മന്ത്രി ഒ.ജെ. ജനീഷ്, ഷാഫി പറമ്പിൽ എംപി എന്നിവർക്കെതിരെ സംഘടന പരാതി നൽകും. ഇരുവരെയും കേസിൽ പ്രതി ചേർക്കണമെന്നാണ് പ്രധാന ആവശ്യം. അക്രമസംഭവങ്ങൾക്ക് ഇവർ നേതൃത്വം നൽകിയെന്നും പ്രക്ഷുബ്ധമായ അന്തരീക്ഷം ശാന്തമാക്കാൻ ഇടപെട്ടില്ലെന്നുമാണ് ആരോപണം. സംഘർഷത്തിനിടയിൽ പരിക്കേറ്റ വേണു എന്ന വിദ്യാർത്ഥിയാണ് പരാതി സമർപ്പിക്കുന്നത്.
തലസ്ഥാന നഗരിയിൽ വിദ്യാർത്ഥികളെ ലക്ഷ്യമിട്ട് പോലീസ് നടത്തുന്ന നടപടികൾ അവസാനിപ്പിക്കണമെന്ന് ചൂണ്ടിക്കാട്ടി ഹൈക്കോടതിയെ സമീപിക്കാനും എസ്എഫ്ഐ തീരുമാനിച്ചു. ഇതിനായി സംഘടന ഇന്ന് പൊതുതാൽപ്പര്യ ഹർജി നൽകും. എസ്എഫ്ഐ ഭാരവാഹികളെ പോലീസ് തിരഞ്ഞുപിടിച്ച് ആക്രമിക്കുകയാണെന്നും തിരുവനന്തപുരത്ത് ക്രമസമാധാന നില ഉറപ്പാക്കാൻ കോടതിയുടെ അടിയന്തര ഇടപെടൽ വേണമെന്നും ഹർജിയിൽ ആവശ്യപ്പെടുന്നുണ്ട്. ഒപ്പം കന്റോൺമെന്റ് സിഐ, എസ്ഐ എന്നിവർക്കെതിരെ കർശന നടപടി സ്വീകരിക്കണമെന്നും ആവശ്യമുന്നയിക്കുന്നു. അതേസമയം, പോലീസുകാരുടെ വസതികളിലേക്ക് നടത്തിവന്ന പ്രതിഷേധങ്ങൾ താൽക്കാലികമായി നിർത്തിവെക്കാനും സംഘടന തീരുമാനിച്ചിട്ടുണ്ട്.
