പാലക്കാട്: സിപിഐഎം പാലക്കാട് ജില്ലാ സെക്രട്ടറി പദവിയിൽ നിന്ന് ഒഴിവാക്കപ്പെട്ട ഇ.എൻ. സുരേഷ് ബാബുവിനെതിരെയുള്ള ലൈംഗിക പീഡന പരാതിയിൽ നിർണായക വിവരങ്ങൾ പുറത്ത്. പാലക്കാട്ടെ ജില്ലാ കമ്മിറ്റി ഓഫീസിനുള്ളിൽ വെച്ചാണ് അതിക്രമശ്രമം ഉണ്ടായതെന്നാണ് വിവരം. വിഷയം സമഗ്രമായി പരിശോധിച്ച് കടുത്ത അച്ചടക്ക നടപടി കൈക്കൊള്ളാനാണ് സിപിഐഎം സംസ്ഥാന നേതൃത്വത്തിന്റെ തീരുമാനം. യുവ അഭിഭാഷക ഉന്നയിച്ച പീഡന പരാതി അങ്ങേയറ്റം ഗൗരവമുള്ളതാണെന്നാണ് പാർട്ടി നേതൃത്വത്തിന്റെ പ്രാഥമിക വിലയിരുത്തൽ.
അതേസമയം, ഇ.എൻ. സുരേഷ് ബാബുവിനെ ചുമതലയിൽ നിന്ന് നീക്കിയത് പാർട്ടിയുടെ സംഘടനാപരമായ നടപടിയുടെ ഭാഗമാണെന്ന് സിപിഐഎം സംസ്ഥാന സമിതി അംഗം എൻ.എൻ. കൃഷ്ണദാസ് വ്യക്തമാക്കി. പാർട്ടിയുടെ പ്രവർത്തന ശൈലി കാലോചിതമായി നവീകരിക്കണമെന്നത് കേന്ദ്ര കമ്മിറ്റിയുടെ നിർദ്ദേശമായിരുന്നുവെന്നും ആ ലക്ഷ്യത്തിലേക്കുള്ള മാറ്റങ്ങളാണ് ഇപ്പോൾ സംഭവിക്കുന്നതെന്നും അദ്ദേഹം പറഞ്ഞു. മാധ്യമങ്ങൾ ഇതിനെ തെറ്റുതിരുത്തൽ നടപടിയെന്ന് വിളിച്ചേക്കാമെങ്കിലും തങ്ങൾക്ക് ഇത് മാറ്റത്തിന് അനുസൃതമായുള്ള നവീകരണമാണെന്നും മാറുന്ന സമൂഹത്തിനൊപ്പം നീങ്ങേണ്ട ഉത്തരവാദിത്തം പാർട്ടിക്കുണ്ടെന്നും ആ നവീകരണത്തിന്റെ ഭാഗമായാണ് ജില്ലാ സെക്രട്ടറിയെ മാറ്റിയതെന്നും അദ്ദേഹം വിശദീകരിച്ചു.
ഇ.എൻ. സുരേഷ് ബാബുവിനെതിരെ വരും ദിവസങ്ങളിൽ കൂടുതൽ കടുത്ത പാർട്ടി നടപടികൾ ഉണ്ടാകുമെന്നാണ് സൂചന. സംഘടനയ്ക്കുള്ളിൽ ഉയർന്ന പരാതികളടക്കം പ്രത്യേക കമ്മീഷനെ നിയോഗിച്ച് അന്വേഷിക്കാനാണ് നീക്കം. അടുത്ത സംസ്ഥാന കമ്മിറ്റി യോഗത്തിൽ കമ്മീഷൻ അംഗങ്ങളെ നിശ്ചയിച്ചേക്കും. പാർട്ടി ഓഫീസിലേക്ക് വിളിച്ചുവരുത്തി തന്നെ അപമാനിച്ചുവെന്ന ആരോപണത്തിന് ആധാരമായ ഡിജിറ്റൽ തെളിവുകൾ പരാതിക്കാരിയായ യുവതി പാർട്ടി നേതൃത്വത്തിന് കൈമാറിയിട്ടുണ്ട്.
സുരേഷ് ബാബുവിനെ പാർട്ടിയുടെ മുഴുവൻ സ്ഥാനങ്ങളിൽ നിന്നും പൂർണ്ണമായി ഒഴിവാക്കണമെന്ന ശക്തമായ നിലപാടിലാണ് ജില്ലാ സെക്രട്ടേറിയറ്റും ജില്ലാ കമ്മിറ്റിയും. അതീവ ഗുരുതരമായ ആരോപണം നിലനിൽക്കെ ഇദ്ദേഹം ഔദ്യോഗിക പദവികളിൽ തുടരുന്നത് രാഷ്ട്രീയമായി വലിയ ക്ഷീണം ചെയ്യുമെന്നാണ് ജില്ലാ ഘടകത്തിന്റെ പക്ഷം. അതിനാൽ സംസ്ഥാന കമ്മിറ്റിയിൽ നിന്നും ജില്ലാ കമ്മിറ്റിയിൽ നിന്നും സുരേഷ് ബാബുവിനെ നീക്കം ചെയ്തേക്കും. പരാതികൾ വിശദമായി പരിശോധിച്ച ശേഷമേ തുടർനടപടികൾ സ്വീകരിക്കൂ എന്ന് പാർട്ടി സംസ്ഥാന സെക്രട്ടറി എം.വി. ഗോവിന്ദനും വ്യക്തമാക്കിയിരുന്നു. ജില്ലയിൽ നിന്നുള്ള കേന്ദ്ര, സംസ്ഥാന വനിതാ നേതാക്കൾ നടത്തിയ പ്രാഥമിക പരിശോധനകൾക്ക് പിന്നാലെയാണ് സുരേഷ് ബാബുവിന്റെ കസേര തെറിച്ചത്.
എന്നാൽ, തികച്ചും സ്വകാര്യ കാരണങ്ങളാൽ താൻ സ്വയം സ്ഥാനമൊഴിയുകയായിരുന്നു എന്നാണ് സുരേഷ് ബാബു ഇന്നലെ മാധ്യമങ്ങളോട് പ്രതികരിച്ചത്. സുരേഷ് ബാബുവിന് പകരം വി. ചെന്താമരാക്ഷനെയാണ് സിപിഐഎം പുതിയ പാലക്കാട് ജില്ലാ സെക്രട്ടറിയായി ചുമതലപ്പെടുത്തിയത്. വ്യക്തിപരമായ കാര്യങ്ങളാൽ സുരേഷ് ബാബു പദവി ഒഴിഞ്ഞതിനാലാണ് തന്നെ നേതൃത്വം ചുമതല ഏൽപ്പിച്ചതെന്ന് ഇരുവരും ചേർന്ന് നടത്തിയ വാർത്താസമ്മേളനത്തിൽ ചെന്താമരാക്ഷൻ പറഞ്ഞിരുന്നു. ചെന്താമരാക്ഷൻ തന്നെക്കാൾ ശക്തനായ ജില്ലാ സെക്രട്ടറിയായി മാറുന്നത് ഭാവിയിൽ കാണാനാകുമെന്ന് വാർത്താസമ്മേളനത്തിൽ സുരേഷ് ബാബുവും പ്രതികരിച്ചിരുന്നു.
