തിരുവനന്തപുരം: സംസ്ഥാനത്തെ സർക്കാർ ആശുപത്രികളിൽ ഒരു മരുന്നും ലഭ്യമല്ലെന്ന തരത്തിൽ നടക്കുന്ന പ്രചാരണങ്ങൾ വസ്തുതാവിരുദ്ധമാണെന്ന് ആരോഗ്യവകുപ്പ് മന്ത്രി കെ. മുരളീധരൻ വ്യക്തമാക്കി. ചില പ്രത്യേക മരുന്നുകൾക്ക് മാത്രമാണ് നിലവിൽ ദൗർലഭ്യമുള്ളതെന്നും ചില പോരായ്മകൾ ഉണ്ടായേക്കാമെങ്കിലും പുറത്തുവരുന്ന പല വിവരങ്ങളും അടിസ്ഥാനരഹിതമാണെന്നും അദ്ദേഹം പറഞ്ഞു.
ഗുണനിലവാരമില്ലെന്ന് ബോധ്യപ്പെട്ടതിനാലാണ് ചില ഫാർമസ്യൂട്ടിക്കൽ കമ്പനികളെ ഒഴിവാക്കിയത്. മരുന്നുകളുടെ ഗുണനിലവാരം പരിശോധിച്ച ശേഷമാണ് ഈ നടപടി സ്വീകരിച്ചത്. അന്താരാഷ്ട്ര തലത്തിലുള്ള യുദ്ധസാഹചര്യങ്ങളും മരുന്ന് ക്ഷാമത്തിന് ഒരു ഘടകമായിട്ടുണ്ടെന്ന് മന്ത്രി നിരീക്ഷിച്ചു. സർക്കാർ ആശുപത്രികളെ മോശമായി ചിത്രീകരിക്കാനുള്ള നീക്കങ്ങളെ ശക്തമായി പ്രതിരോധിക്കുമെന്നും വിദേശ നിയന്ത്രണത്തിലുള്ള സ്വകാര്യ കുത്തകകളുടെ ദുഷ്ടലാക്കാണ് സർക്കാർ ആശുപത്രികൾക്കെതിരെയുള്ള ഇത്തരം പ്രചാരണങ്ങൾക്ക് പിന്നിലെന്നും അദ്ദേഹം കൂട്ടിച്ചേർത്തു.
ചില സ്വകാര്യ ആശുപത്രികൾ മരുന്നുകൾക്കും മുറി വാടകയ്ക്കും അമിതവില ഈടാക്കുന്നതായും മന്ത്രി ചൂണ്ടിക്കാട്ടി. ഇത്തരം ചൂഷണങ്ങൾ നിയന്ത്രിക്കാൻ സർക്കാർ ആലോചന നടത്തുന്നുണ്ടെന്നും ഇതിനായി പ്രത്യേക സമിതി രൂപീകരിച്ചിട്ടുണ്ടെന്നും ആരോഗ്യമന്ത്രി അറിയിച്ചു. സമിതിയുടെ ശുപാർശകൾ ലഭിച്ച ശേഷം എല്ലാ വിഭാഗങ്ങളുമായും ചർച്ചകൾ നടത്തുമെന്നും തീരുമാനങ്ങൾ ഏകപക്ഷീയമായി അടിച്ചേൽപ്പിക്കില്ലെന്നും എന്നാൽ ഈ മേഖലയിൽ സർക്കാർ നിയന്ത്രണം അത്യന്താപേക്ഷിതമാണെന്നും കെ. മുരളീധരൻ വ്യക്തമാക്കി.
അതേസമയം, താലൂക്ക് ആശുപത്രികളിലും കുടുംബാരോഗ്യ കേന്ദ്രങ്ങളിലും കഴിഞ്ഞ ഏതാനും മാസങ്ങളായി മരുന്നുകൾ ലഭിക്കുന്നില്ലെന്ന പരാതിയുമായി രോഗികൾ രംഗത്തെത്തിയിരുന്നു. ചില മരുന്നുകൾ ലഭ്യമാക്കുന്നതിനായി വീണ്ടും ടെൻഡർ (റീ-ടെൻഡർ) വിളിക്കേണ്ടി വന്നത് സംഭരണത്തിൽ കനത്ത കാലതാമസത്തിന് കാരണമായെന്നാണ് റിപ്പോർട്ടുകൾ. വിഷയത്തിൽ സർക്കാരിനെതിരെ രൂക്ഷ വിമർശനവുമായി പ്രതിപക്ഷവും രംഗത്തെത്തിയിരുന്നു. ഇതിനിടെ, സംസ്ഥാനത്ത് മരുന്ന് ക്ഷാമം അതീവ രൂക്ഷമാണെന്നും ആശുപത്രി സൂപ്രണ്ടുമാർ അടിയന്തരമായി മരുന്നുകൾ ശേഖരിക്കണമെന്നും ആവശ്യപ്പെട്ട് ആരോഗ്യവകുപ്പ് ഡയറക്ടർ ഡോ. വി. മീനാക്ഷി അയച്ച ശബ്ദസന്ദേശവും പുറത്തുവന്നിരുന്നു. ജില്ലാ മെഡിക്കൽ ഓഫീസർമാരുടെയും ജില്ലാ പ്രോഗ്രാം മാനേജർമാരുടെയും ഔദ്യോഗിക ഗ്രൂപ്പിലാണ് ഈ ശബ്ദരേഖ എത്തിയത്.
