തിരുവനന്തപുരം: പി. നന്ദകുമാർ നടത്തിയ വിദ്വേഷപരമായ പരാമർശങ്ങൾക്ക് തുല്യമായ പ്രസ്താവനകൾ മുൻപ് പിണറായി വിജയനും നടത്തിയിട്ടുണ്ടെന്ന് മന്ത്രി സണ്ണി ജോസഫ്. സിപിഐഎമ്മിന്റെ വ്യക്തമായ രാഷ്ട്രീയ തന്ത്രത്തിന്റെ ഭാഗമാണിതെന്നും അവരുടെ നിലപാടുകൾ തികച്ചും വൈരുദ്ധ്യം നിറഞ്ഞതാണെന്നും അദ്ദേഹം ചൂണ്ടിക്കാട്ടി. വിഷയത്തിൽ നിലപാട് തിരുത്താൻ നന്ദകുമാറോ സിപിഐഎമ്മോ തയ്യാറാകുന്നില്ലെന്നും തിരുത്തലുകളല്ല മറിച്ച് തെറ്റുകൾ ആവർത്തിക്കാനാണ് പാർട്ടി ശ്രമിക്കുന്നതെന്നും സണ്ണി ജോസഫ് കുറ്റപ്പെടുത്തി.
സിപിഐഎം മലപ്പുറം വിപുലീകൃത ജില്ലാ കമ്മിറ്റി യോഗത്തിൽ സ്വാഗതം ആശംസിച്ചു സംസാരിക്കുമ്പോഴായിരുന്നു പി. നന്ദകുമാറിന്റെ വിവാദ പ്രസംഗം. മലപ്പുറത്തിന് പ്രത്യേകമായ സാഹചര്യങ്ങളുണ്ടെന്നും ജില്ല മതമൗലിക-വർഗ്ഗീയ ശക്തികളുടെ കേന്ദ്രമായി മാറിയിരിക്കുകയാണെന്നും, ഇതിനെ പ്രതിരോധിച്ച് മതേതര പ്രസ്ഥാനങ്ങളെ യോജിപ്പിച്ചു കൊണ്ടുപോകുന്ന കമ്മ്യൂണിസ്റ്റ് പാർട്ടി പുതിയ കാലഘട്ടത്തിലെ രാഷ്ട്രീയ ഉത്തരവാദിത്തങ്ങൾ എങ്ങനെ നിറവേറ്റണമെന്ന് പരിശോധിക്കണമെന്നുമായിരുന്നു നന്ദകുമാറിന്റെ പ്രസ്താവന. പ്രതിപക്ഷ നേതാവ് പിണറായി വിജയൻ, കെ.കെ. ശൈലജ എന്നിവരുൾപ്പെടെയുള്ള പ്രമുഖ നേതാക്കളുടെ സാന്നിധ്യത്തിലായിരുന്നു നന്ദകുമാർ ഈ അധിക്ഷേപ വാക്കുകൾ നടത്തിയത്.
അതേസമയം, നന്ദകുമാറിന്റെ ഈ വാക്കുകൾ പാർട്ടിയുടെ നയമല്ലെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ നേരത്തെ വ്യക്തമാക്കിയിരുന്നു. മുസ്ലിം ന്യൂനപക്ഷങ്ങളെ ഒപ്പം ചേർത്തുപിടിക്കുന്നതാണ് സിപിഐഎമ്മിന്റെ ഔദ്യോഗിക നിലപാടെന്നും, സംസ്ഥാന സെക്രട്ടറി വ്യക്തമാക്കുന്ന കാര്യങ്ങളാണ് പാർട്ടിയുടെ നിലപാടായി കണക്കാക്കേണ്ടതെന്നും അദ്ദേഹം വിശദീകരിച്ചിരുന്നു.
