തിരുവനന്തപുരം: വിവരസാങ്കേതിക വകുപ്പിന്റെ പേര് പുനർനാമകരണം ചെയ്ത് സംസ്ഥാന സർക്കാർ. 'വിവരസാങ്കേതികവിദ്യ, നിർമ്മിത ബുദ്ധി, ഭാവി സാങ്കേതികവിദ്യ വകുപ്പ്' (ഡിപ്പാർട്ട്മെന്റ് ഓഫ് ഇൻഫർമേഷൻ ടെക്നോളജി, ആർട്ടിഫിഷ്യൽ ഇന്റലിജൻസ് ആൻഡ് ഫ്യൂച്ചർ ടെക്നോളജീസ്) എന്ന പുതിയ പേരിലാണ് ഇനിമുതൽ ഈ വകുപ്പ് പ്രവർത്തിക്കുക. പേരുമാറ്റം സംബന്ധിച്ച ഔദ്യോഗിക ഉത്തരവ് സർക്കാർ പുറത്തിറക്കി.
വകുപ്പിന്റെ ഉത്തരവാദിത്തങ്ങളും പ്രവർത്തന പരിധികളും വലിയതോതിൽ വിപുലീകരിക്കപ്പെട്ട സാഹചര്യത്തിലാണ് ഇത്തരമൊരു നടപടിയെന്ന് സർക്കാർ വ്യക്തമാക്കി. 2026-ലെ ഗവർണറുടെ നയപ്രഖ്യാപന പ്രസംഗത്തിൽ മുന്നോട്ടുവെച്ച കേരളത്തിന്റെ സാങ്കേതിക വികസന ദിശാസൂചികയ്ക്ക് അനുസൃതമായാണ് ഈ മാറ്റം നടപ്പാക്കിയിരിക്കുന്നത്. ഇക്കഴിഞ്ഞ ബുധനാഴ്ച ചേർന്ന മന്ത്രിസഭാ യോഗത്തിലാണ് ഇതുസംബന്ധിച്ച അന്തിമ തീരുമാനമെടുത്തത്; തുടർന്നാണ് ഇന്ന് ഔദ്യോഗിക ഉത്തരവ് പുറപ്പെടുവിച്ചത്.
സാധാരണ ഐടി, ഐടിഇഎസ് മേഖലകൾക്കപ്പുറം, അതിവേഗം വളരുന്ന പുത്തൻ അത്യാധുനിക സാങ്കേതിക രംഗങ്ങളിലേക്കും വകുപ്പിന്റെ പ്രവർത്തന വ്യാപ്തി വ്യാപിപ്പിച്ചിട്ടുണ്ട്. കേരളത്തിന്റെ ഡിജിറ്റൽ ഭരണ സംവിധാനങ്ങൾ, ഭാവി സാങ്കേതിക ശേഷികൾ, സെമികണ്ടക്ടർ ഇക്കോസിസ്റ്റം, വിജ്ഞാനാധിഷ്ഠിത വ്യവസായ രംഗം എന്നിവ കൂടുതൽ കരുത്തുറ്റതാക്കുകയാണ് സർക്കാർ ഇതിലൂടെ ലക്ഷ്യമിടുന്നത്. ഈ മാറ്റത്തിന് അനുസൃതമായി സർക്കാരിന്റെ കാര്യനിർവ്വഹണ ചട്ടങ്ങളിൽ ആവശ്യമായ ഭേദഗതികൾ വരുത്താൻ പൊതുഭരണ വകുപ്പിന് നിർദ്ദേശം നൽകിയിട്ടുണ്ട്.
