പാലക്കാട്: കഞ്ചിക്കോട് ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിൽ അതിഥിത്തൊഴിലാളി കുടുംബത്തിലെ കുട്ടികളോട് അധ്യാപിക വിവേചനപരമായ രീതിയിൽ പെരുമാറിയതിനെ തുടർന്ന് ആറാം ക്ലാസിൽ പഠിക്കുന്ന ഇരട്ട സഹോദരങ്ങൾ സ്കൂൾ പഠനം നിർത്തിയെന്ന പരാതിയിൽ സംസ്ഥാന ബാലാവകാശ കമ്മീഷന്റെ അടിയന്തര ഇടപെടൽ. വിഷയത്തിൽ കമ്മീഷൻ സ്വമേധയാ (സ്യുമോട്ടോ) കേസെടുത്ത് നടപടികളിലേക്ക് കടന്നു. ഇതര സംസ്ഥാനക്കാരായ വിദ്യാർത്ഥികൾക്ക് നേരെ വിദ്യാലയത്തിൽ വെച്ച് അധ്യാപിക പക്ഷപാതപരമായി പെരുമാറിയ വാർത്ത റിപ്പോർട്ടർ ചാനലായിരുന്നു ആദ്യമായി പുറത്തുകൊണ്ടുവന്നത്.
ആറാം ക്ലാസ് വിദ്യാർത്ഥികളായ ചന്ദൻ കുമാർ, കുന്ദൻ കുമാർ എന്നീ സഹോദരങ്ങളാണ് ഈ ദുരനുഭവത്തെ തുടർന്ന് സ്കൂളിൽ പോക്ക് അവസാനിപ്പിച്ചത്. ഈ നടപ്പ് അധ്യയന വർഷത്തിൽ വിദ്യാലയത്തിൽ ചേർന്ന തങ്ങളുടെ മക്കളെ അധ്യാപിക ക്ലാസിന് പുറത്താക്കിയെന്നും, മറ്റ് സംസ്ഥാനങ്ങളിൽ നിന്നുള്ള കുട്ടികളെ ഇവിടെ പഠിപ്പിക്കാൻ കഴിയില്ലെന്ന് നിലപാടെടുത്തെന്നും കുട്ടികളുടെ മാതാവായ ചോട്ടു മഞ്ചിയാണ് വെളിപ്പെടുത്തിയത്. ക്ലാസിലെ മറ്റ് സഹപാഠികളുടെ മുന്നിൽ വെച്ച് അധ്യാപിക മക്കളെ പരസ്യമായി അവഹേളിച്ചുവെന്നും ഇത് കുട്ടികളുടെ മനസ്സിനെ കടുത്ത രീതിയിൽ മുറിവേൽപ്പിച്ചുവെന്നും പരാതിയിൽ ചൂണ്ടിക്കാട്ടുന്നുണ്ട്.
