കൊല്ലം: കൊല്ലത്ത് മരിച്ച നിലയിൽ കണ്ടെത്തിയ ഗൃഹനാഥന്റെ മരണം കൊലപാതകമാണെന്ന് തെളിഞ്ഞു. ചെറുമൂട് സ്വദേശിയായ രാജുവിന്റെ (53) മരണമാണ് ആസൂത്രിത കൊലപാതകമാണെന്ന് പോലീസ് സ്ഥിരീകരിച്ചത്. സംഭവത്തിൽ ഇയാളുടെ ഭാര്യ ലേഖ മേരിയെ (48) പോലീസ് കസ്റ്റഡിയിലെടുത്തു.
രാജുവിന്റെ കഴുത്തിൽ ബെൽറ്റ് മുറുക്കിയാണ് കൊലപ്പെടുത്തിയതെന്ന് ചോദ്യം ചെയ്യലിൽ ലേഖ പോലീസിനോട് സമ്മതിച്ചു. ഭർത്താവിന്റെ പേരിലുള്ള സ്ഥലം സ്വന്തമാക്കുകയെന്ന ലക്ഷ്യത്തോടെയാണ് കൃത്യം നടത്തിയതെന്നും ഇവർ മൊഴി നൽകിയിട്ടുണ്ട്. ഇതിനുപുറമെ, രാജുവിന് അമിത അളവിൽ മരുന്നുകൾ നൽകിയിരുന്നോ എന്നും പോലീസ് സംശയിക്കുന്നുണ്ട്. മരണകാരണത്തിൽ കൂടുതൽ വ്യക്തത വരുത്തുന്നതിനായി രാജുവിന്റെ ആന്തരികാവയവങ്ങൾ വിശദമായ രാസപരിശോധനയ്ക്കായി അയച്ചു. ഒക്ടോബർ രണ്ടിനായിരുന്നു രാജുവിനെ വീടിനുള്ളിൽ മരിച്ച നിലയിൽ കണ്ടെത്തിയത്. സംഭവത്തിൽ പങ്കുണ്ടെന്ന് സംശയിക്കുന്ന ലേഖയുടെ ആൺസുഹൃത്തായ പ്രാക്കുളം സ്വദേശിയെ പോലീസ് സംഘം ഇപ്പോൾ നിരീക്ഷിച്ചുവരികയാണ്.
