തിരുവനന്തപുരം: മലപ്പുറം ജില്ലയെക്കുറിച്ച് മുൻ എംഎൽഎയും സിപിഐഎം നേതാവുമായ പി. നന്ദകുമാർ നടത്തിയ പ്രസ്താവന പൂർണ്ണമായും തെറ്റാണെന്ന നിലപാടുമായി സിപിഐ. മലപ്പുറം മതമൗലിക-വർഗ്ഗീയ ശക്തികളുടെ കേന്ദ്രമാണെന്ന പരാമർശത്തിനെതിരെയാണ് സിപിഐ പരസ്യമായി രംഗത്തെത്തിയത്. ഒരു കമ്മ്യൂണിസ്റ്റ് നേതാവിൽ നിന്ന് ഒരിക്കലും ഉണ്ടാകാൻ പാടില്ലാത്ത സമീപനമാണിതെന്നും മലപ്പുറത്തെ വർഗ്ഗീയതയുടെ താവളമായി ചിത്രീകരിക്കുന്നത് രാഷ്ട്രീയമായി ശരിയല്ലെന്നും സിപിഐ സംസ്ഥാന സെക്രട്ടറി ബിനോയ് വിശ്വം വ്യക്തമാക്കി. ഇത്തരമൊരു രാഷ്ട്രീയ അപരാധം കാണിക്കാൻ ഒരു കമ്മ്യൂണിസ്റ്റ് നേതാവിനും അവകാശമില്ലെന്നും നന്ദകുമാറും പാർട്ടിയും ഈ തെറ്റ് തിരുത്തുമെന്നാണ് പ്രതീക്ഷിക്കുന്നതെന്നും അദ്ദേഹം കൂട്ടിച്ചേർത്തു.
എന്നാൽ, മാധ്യമങ്ങൾ തന്റെ വാക്കുകളെ വളച്ചൊടിക്കുകയായിരുന്നുവെന്നാണ് നന്ദകുമാറിന്റെ വിശദീകരണം. താൻ പറഞ്ഞതിൽ ഖേദപ്രകടനമോ തിരുത്തോ നടത്താൻ അദ്ദേഹം തയ്യാറായില്ല. മലപ്പുറത്തെ വർഗ്ഗീയ ശക്തികളുടെ കേന്ദ്രമാക്കി മാറ്റാനുള്ള നീക്കങ്ങൾ നടക്കുന്നുവെന്നാണ് താൻ അർത്ഥമാക്കിയതെന്നും ബിജെപിയും മുസ്ലിം ലീഗും ഇതിനായി ശ്രമിക്കുകയാണെന്നും ജില്ലയിൽ സംഘടിപ്പിക്കാനിരിക്കുന്ന കുംഭമേള ഇതിന്റെ ഭാഗമാണെന്നും അദ്ദേഹം ആരോപിച്ചു. തെരഞ്ഞെടുപ്പ് ഘട്ടങ്ങളിൽ മുസ്ലിം ലീഗും ഇതേ ശ്രമം നടത്തിയിട്ടുണ്ടെന്നും താൻ പറഞ്ഞ കാര്യങ്ങളെ മാധ്യമങ്ങൾക്ക് ഇഷ്ടമുള്ള രീതിയിൽ വേണമെങ്കിൽ വ്യാഖ്യാനിക്കാമെന്നും നന്ദകുമാർ പ്രതികരിച്ചു.
സിപിഐഎം മലപ്പുറം ജില്ലാ വിപുലീകൃത കമ്മിറ്റി യോഗത്തിൽ സ്വാഗതം ആശംസിക്കുന്നതിനിടയിലായിരുന്നു നന്ദകുമാറിന്റെ വിവാദ പ്രസംഗം. മലപ്പുറം ജില്ലയ്ക്ക് സവിശേഷമായ സാഹചര്യങ്ങളുണ്ടെന്നും അവിടം മതമൗലിക വർഗ്ഗീയവാദികളുടെ താവളമാണെന്നും, അതിനെ ചെറുത്ത് മതേതര പ്രസ്ഥാനങ്ങളെ യോജിപ്പിച്ചു കൊണ്ടുപോകുന്ന കമ്മ്യൂണിസ്റ്റ് പ്രസ്ഥാനം പുതിയ കാലഘട്ടത്തിൽ രാഷ്ട്രീയ കടമകൾ എങ്ങനെ നിർവ്വഹിക്കണമെന്ന് ആലോചിക്കണമെന്നുമായിരുന്നു നന്ദകുമാറിന്റെ പ്രസ്താവന. പ്രതിപക്ഷ നേതാവ് പിണറായി വിജയൻ, കേന്ദ്ര കമ്മിറ്റി അംഗം കെ.കെ. ശൈലജ തുടങ്ങിയ മുതിർന്ന നേതാക്കളുടെ സാന്നിധ്യത്തിലായിരുന്നു ഈ പരാമർശം.
നന്ദകുമാറിന്റെ നിലപാടിനെതിരെ പാർട്ടിക്കുള്ളിൽ നിന്നുതന്നെ കടുത്ത അതൃപ്തി ഉയരുന്നുണ്ട്. അതേസമയം, ആക്ഷേപകരമായ പരാമർശം നടത്തിയ നേതാവിന്റെ നിലപാട് തന്നെയാണ് പിണറായി വിജയനും സിപിഐഎമ്മിനും ഉള്ളതെന്നുവേണം കരുതാനെന്ന് മുഖ്യമന്ത്രി വി.ഡി. സതീശൻ ആരോപിച്ചു. അതുകൊണ്ടാണ് ആ വാക്കുകൾ തള്ളിക്കളയാനോ തിരുത്തൽ വരുത്താനോ പിണറായി വിജയൻ തയ്യാറാകാതിരുന്നതെന്നും അദ്ദേഹം കുറ്റപ്പെടുത്തി. വർഗ്ഗീയച്ചുവയുള്ള പരാമർശം നടത്തിയ നന്ദകുമാറിനെതിരെ കേസെടുക്കണമെന്ന് ആവശ്യപ്പെട്ട് യൂത്ത് ലീഗും രംഗത്തെത്തി. ഭാരതീയ ന്യായ സംഹിതയിലെ വകുപ്പ് 356 (അപകീർത്തിപ്പെടുത്തൽ), വകുപ്പ് 196 (മതത്തിന്റെ പേരിൽ ശത്രുത വളർത്തൽ), വകുപ്പ് 353(2) (സമൂഹത്തിൽ ഭീതിയും അസ്വസ്ഥതയും സൃഷ്ടിക്കുന്ന പ്രസ്താവനകൾ) എന്നിവ പ്രകാരം ശിക്ഷാർഹമായ കുറ്റമാണ് നന്ദകുമാർ ചെയ്തതെന്ന് യൂത്ത് ലീഗ് തങ്ങളുടെ പരാതിയിൽ വ്യക്തമാക്കുന്നു. ഇതിന് പുറമെ നന്ദകുമാറിനെതിരെ എംഎസ്എഫ് മലപ്പുറം ജില്ലാ കമ്മിറ്റിയും പൊന്നാനി പോലീസ് സ്റ്റേഷനിൽ ഔദ്യോഗികമായി പരാതി നൽകിയിട്ടുണ്ട്.
