കോഴിക്കോട്: സംസ്ഥാനത്തെ ഭരണം നിയന്ത്രിക്കുന്നത് മുസ്ലിം ലീഗും ജമാഅത്തെ ഇസ്ലാമിയും ചേർന്നാണെന്ന് ബിജെപി നേതാവ് കെ. സുരേന്ദ്രൻ. വി.ഡി. സതീശൻ മുഖ്യമന്ത്രി കസേരയിലിരിക്കുന്നു എന്നതല്ലാതെ സർക്കാരിന്റെ കടിഞ്ഞാൺ ലീഗിന്റെയും ജമാഅത്തെ ഇസ്ലാമിയുടെയും കൈകളിലാണ്.
നൽകിയ ഉറപ്പുകളെല്ലാം സർക്കാർ കാറ്റിൽപ്പറത്തി. ജനങ്ങൾക്ക് യാതൊരു പ്രയോജനവുമുണ്ടായില്ല; പകരം ഭരണത്തിന്റെ നേട്ടങ്ങളെല്ലാം ലീഗും ജമാഅത്തെ ഇസ്ലാമിയും വീതിച്ചെടുക്കുകയാണുണ്ടായത്. പിഎം ശ്രീ സ്കൂൾ പദ്ധതി നടപ്പാക്കുമെന്ന് പ്രഖ്യാപിച്ച സർക്കാർ ഇപ്പോൾ അതിൽ നിന്നും പിന്മാറിയത് ലീഗിന്റെ കടുത്ത സമ്മർദ്ദം കാരണമാണ്. മുഖ്യമന്ത്രിക്ക് നട്ടെല്ലുണ്ടോ അതോ വാഴപ്പിണ്ടിയാണോയെന്ന് ചോദിച്ച സുരേന്ദ്രൻ, പദ്ധതി നടപ്പാക്കുമെന്ന് ഉറപ്പുനൽകിയ ശേഷം എന്തിനാണ് ഇപ്പോൾ ഒളിച്ചോടുന്നതെന്നും ആരാഞ്ഞു. ഇതര സമുദായങ്ങൾക്ക് ഭരണത്തിൽ എന്ത് അർഹമായ പങ്കാളിത്തമാണ് ലഭിച്ചത്? അവർക്കൊന്നും ലഭിച്ചില്ല. യുഡിഎഫ് മുന്നണിയിൽ ചർച്ച ചെയ്യാത്ത കാര്യങ്ങൾ പോലും വി.ഡി. സതീശൻ മുസ്ലിം ലീഗുമായി രഹസ്യമായി ആലോചിക്കുന്നുണ്ട്. ഭരണപരിഷ്കാര കമ്മീഷൻ പദവി ആട്ടിൻകഴുത്തിലെ മുലപോലെ ആർക്കും ഉപകാരമില്ലാത്ത ഒന്നാണ്; എം.കെ. മുനീറിന് മറ്റ് വല്ല പദവിയുമാണ് നൽകേണ്ടിയിരുന്നത്. മുഖ്യമന്ത്രിക്ക് യാത്രാവിമാനം ഏർപ്പാടാക്കി നൽകിയത് ഏതോ കാട്ടുകള്ളനാണ്; അല്ലെങ്കിൽ ആ വ്യക്തി ആരാണെന്ന് പരസ്യമായി വെളിപ്പെടുത്താൻ സർക്കാർ തയ്യാറാകുമായിരുന്നില്ലേ എന്നും അദ്ദേഹം ചോദിച്ചു.
അതേസമയം, വിവാദമായ പിഎം ശ്രീ പദ്ധതിയുമായി ഈ ഘട്ടത്തിൽ മുന്നോട്ടുപോകേണ്ടതില്ലെന്ന നിലപാടിലാണ് പൊതുവിദ്യാഭ്യാസ വകുപ്പ്. മുസ്ലിം ലീഗിനുള്ളിൽ ഉയർന്ന ശക്തമായ വിയോജിപ്പുകളുടെ പശ്ചാത്തലത്തിലാണ് വിദ്യാഭ്യാസ മന്ത്രി ഇത്തരമൊരു നിർദ്ദേശം നൽകിയത്. വിഷയത്തിൽ വിദ്യാഭ്യാസ മന്ത്രി മുഖ്യമന്ത്രിയുമായി ആശയവിനിമയം നടത്തിയതായാണ് സൂചന. പുതിയ വിവാദങ്ങൾക്ക് വഴിതുറക്കാതെ തൽക്കാലം തുടർനടപടികൾ വേണ്ടെന്നാണ് വകുപ്പിന്റെ തീരുമാനം. നിലവിൽ നിരവധി അനാവശ്യ വിവാദങ്ങൾ ഉയർന്നുകഴിഞ്ഞു; കടുത്ത നിർബന്ധിത സാഹചര്യം ഉണ്ടായാൽ മാത്രമേ ഇനി തുടർനീക്കങ്ങളിലേക്ക് കടക്കൂ. ഇതിന്റെ ഭാഗമായി ഉപസമിതി യോഗം ചേരുന്നത് അടക്കമുള്ള കാര്യങ്ങൾ താത്കാലികമായി മരവിപ്പിച്ചു.
തീവ്രമായ രാഷ്ട്രീയ എതിർപ്പുകളും സമ്മർദ്ദങ്ങളും ഉടലെടുത്ത സാഹചര്യത്തിലാണ് വിദ്യാഭ്യാസ വകുപ്പ് ഇങ്ങനെയൊരു അനൗദ്യോഗിക നിലപാടിലേക്ക് നീങ്ങിയത്. വിദ്യാർത്ഥി സംഘടനയായ എംഎസ്എഫ് മുതൽ മുസ്ലിം ലീഗ് നേതൃത്വം വരെ പദ്ധതിക്കെതിരെ ശക്തമായ വിയോജിപ്പിലാണ്. നയപരമായ ഇത്തരം ചാഞ്ചാട്ടങ്ങൾ തങ്ങൾക്ക് വോട്ട് ചെയ്ത ജനങ്ങൾക്കിടയിൽ തെറ്റിദ്ധാരണ പരത്തുമെന്നാണ് ലീഗിന്റെ നിരീക്ഷണം. തുടക്കത്തിൽ മന്ത്രി എൻ. ഷംസുദ്ദീൻ ഈ വിഷയത്തിൽ നിശബ്ദത പാലിച്ചെങ്കിലും, ഒടുവിൽ പദ്ധതിയിൽ ഉടനടി തീരുമാനങ്ങൾ വേണ്ടെന്ന നിലപാടിലേക്ക് എത്തിച്ചേരുകയായിരുന്നു.
