തൃശൂർ: കരുവന്നൂർ സഹകരണ ബാങ്ക് കള്ളപ്പണ ഇടപാട് കേസിൽ പ്രതിചേർക്കപ്പെട്ട നടപടി റദ്ദാക്കണമെന്ന് ആവശ്യപ്പെട്ട് മുൻനിര സിപിഐഎം നേതാക്കൾ കോടതിയെ സമീപിച്ചു. കെ. രാധാകൃഷ്ണൻ എം.പി, എ.സി. മൊയ്തീൻ എം.എൽ.എ എന്നിവരുൾപ്പെടെയുള്ളവരാണ് കലൂർ പി.എം.എൽ.എ പ്രത്യേക കോടതിയിൽ വിടുതൽ ഹർജി സമർപ്പിച്ചത്. തങ്ങൾക്കെതിരായ കേസ് പൂർണ്ണമായും രാഷ്ട്രീയപ്രേരിതമാണെന്ന് ഇവർ ഹർജിയിൽ ചൂണ്ടിക്കാട്ടുന്നു.
എന്നാൽ നേതാക്കളുടെ ഈ ആവശ്യത്തെ ശക്തമായി എതിർക്കാനാണ് എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) തീരുമാനം. ഹർജിയെ പ്രതിരോധിച്ച് ഇ.ഡി ഉടൻ കോടതിയിൽ എതിർ സത്യവാങ്മൂലം സമർപ്പിക്കും. തട്ടിപ്പിലൂടെ സമാഹരിച്ച കള്ളപ്പണം പാർട്ടി ഓഫീസ് നിർമ്മാണത്തിനായി ഉപയോഗിച്ചുവെന്നതിന് കൃത്യമായ തെളിവുകളുണ്ടെന്നാണ് അന്വേഷണ ഏജൻസിയുടെ വാദം. കൂടാതെ കമ്മീഷൻ വ്യവസ്ഥയിലും പണം കൈപ്പറ്റി. സബ് കമ്മിറ്റിയെ മറയാക്കി ബാങ്ക് ഭരണസമിതിയുടെ പ്രവർത്തനങ്ങളെ ഇവർ നേരിട്ട് നിയന്ത്രിച്ചിരുന്നുവെന്നും ഇ.ഡി ആക്ഷേപിക്കുന്നു. കേസിൽ അന്വേഷണ ഏജൻസി നേരത്തെ തന്നെ വിശദമായ കുറ്റപത്രം നൽകിയിരുന്നു.
തൃശൂർ ജില്ലയിലെ മുൻ സിപിഐഎം ജില്ലാ സെക്രട്ടറിമാരായ മൂന്ന് പ്രമുഖ നേതാക്കളെ ഉൾപ്പെടെ പ്രതിപ്പട്ടികയിൽ ചേർത്തുകൊണ്ടാണ് ഇ.ഡി കോടതിയിൽ അന്തിമ കുറ്റപത്രം സമർപ്പിച്ചത്. കഴിഞ്ഞ വർഷം മെയ് മാസത്തിലായിരുന്നു രണ്ടാംഘട്ട കുറ്റപത്രം നൽകിയത്. ആദ്യ കുറ്റപത്രത്തിൽ 55 പേരും രണ്ടാമത്തേതിൽ 28 പേരും ഉൾപ്പെട്ടതോടെ ആകെ പ്രതികളുടെ എണ്ണം 83 ആയി ഉയർന്നു. അന്വേഷണത്തിന്റെ പേരിൽ ഏജൻസി രാഷ്ട്രീയ വേട്ടയാടൽ നടത്തുകയാണെന്ന കടുത്ത ആക്ഷേപമായിരുന്നു സിപിഐഎം തുടക്കം മുതലേ ഉന്നയിച്ചിരുന്നത്.
2012 മുതൽ ബാങ്കിൽ വൻ സാമ്പത്തിക തിരിമറികൾ നടക്കുന്നുണ്ടെന്ന് കാണിച്ച് മുൻ ജീവനക്കാരനും മുൻ പാർട്ടി പ്രവർത്തകനുമായ എം.വി. സുരേഷ് നൽകിയ പരാതിയുടെ അടിസ്ഥാനത്തിൽ 2021 ജൂലൈ 21-നാണ് ഇരിങ്ങാലക്കുട പോലീസ് ആദ്യമായി കേസ് രജിസ്റ്റർ ചെയ്യുന്നത്. പാർട്ടി നേതൃത്വത്തിന് നേരിട്ട് പരാതി നൽകിയിട്ടും യാതൊരു നടപടിയും ഉണ്ടാകാതിരുന്നതിനാലാണ് അദ്ദേഹം പോലീസിനെ സമീപിച്ചത്. തുടർന്ന്, പതിറ്റാണ്ടുകളായി സിപിഐഎമ്മിന്റെ പൂർണ്ണ ആധിപത്യത്തിലുണ്ടായിരുന്ന ബാങ്ക് ഭരണസമിതിയെ സർക്കാർ പിരിച്ചുവിടുകയായിരുന്നു.
ബാങ്ക് സെക്രട്ടറി ഉൾപ്പെടെയുള്ള ആറ് സിപിഐഎം പ്രാദേശിക നേതാക്കളെ പ്രതികളാക്കിയായിരുന്നു ലോക്കൽ പോലീസിന്റെ ആദ്യ അന്വേഷണം. തുടർന്ന് നടത്തിയ പരിശോധനയിൽ 219 കോടി രൂപയുടെ തിരിമറി നടന്നതായി ബോധ്യപ്പെട്ടു. വ്യാജ പ്രമാണങ്ങൾ ഉണ്ടാക്കിയും വസ്തുക്കളുടെ മൂല്യം പെരുപ്പിച്ചു കാട്ടിയും യഥേഷ്ടം വായ്പകൾ നൽകൽ, ചിട്ടി തട്ടിപ്പ്, ബാങ്കിന്റെ സൂപ്പർമാർക്കറ്റുകളിലേക്ക് നിത്യോപയോഗ സാധനങ്ങൾ വാങ്ങിയതിലെ കൃത്രിമം തുടങ്ങി വിവിധ മേഖലകളിൽ തട്ടിപ്പ് നടന്നതായി കണ്ടെത്തുകയായിരുന്നു.
വസ്തു ഉടമകൾ അറിയാതെ അവരുടെ ഭൂമി ഈടായി വെച്ച് വലിയ തുകകൾ വായ്പയെടുക്കുക, ബാങ്കിൽ അംഗത്വം ഇല്ലാത്തവർക്കായി വ്യാജരേഖകളും ബിനാമി പേരുകളും ചമച്ച് കോടികൾ വിതരണം ചെയ്യുക, ഒരേ പ്രമാണം ഉപയോഗിച്ച് വീണ്ടും വീണ്ടും വായ്പയെടുക്കുക തുടങ്ങിയ ക്രമക്കേടുകളാണ് അന്വേഷണത്തിൽ മറനീക്കി പുറത്തുവന്നത്. സാമ്പത്തിക തട്ടിപ്പിന്റെ വ്യാപ്തി ഉയർന്നതോടെ കേസ് ക്രൈംബ്രാഞ്ചിന്റെ പ്രത്യേക സംഘത്തിന് വിടുകയും, തുടർന്ന് കള്ളപ്പണ ഇടപാടുകൾ കണ്ടെത്തിയതോടെ ഇ.ഡി കേസ് ഏറ്റെടുക്കുകയുമായിരുന്നു.
