തിരുവനന്തപുരം: തലസ്ഥാനത്തെ യൂണിവേഴ്സിറ്റി ഹോസ്റ്റലിൽ ഉണ്ടായ അക്രമാസക്തമായ സംഘർഷത്തിൽ ഉന്നതതല അന്വേഷണം നടത്താൻ ഉന്നത വിദ്യാഭ്യാസ വകുപ്പ് ഉത്തരവിട്ടു. പ്രത്യേക അന്വേഷണ കമ്മീഷനെ നിയോഗിച്ച് സംഭവത്തിൽ സമഗ്രമായ പരിശോധന നടത്താനാണ് വകുപ്പിന്റെ തീരുമാനം. ഹോസ്റ്റലിൽ നിന്ന് മദ്യക്കുപ്പികളും കല്ലുകളും വലിച്ചെറിഞ്ഞ നടപടി അതീവ ഗൗരവത്തോടെയാണ് ഉന്നത വിദ്യാഭ്യാസ വകുപ്പ് കാണുന്നത്. ഹോസ്റ്റൽ മുറികളിൽ മദ്യക്കുപ്പികൾ എങ്ങനെ എത്തിച്ചേർന്നുവെന്നും, പുറത്തുനിന്നുള്ള ആളുകൾക്ക് അവിടേക്ക് എങ്ങനെ പ്രവേശനം ലഭിച്ചുവെന്നതിലും വിശദമായ പരിശോധനയുണ്ടാകും. ഇതിനൊപ്പം ഹോസ്റ്റൽ സമുച്ചയത്തിന് നേരെ പുറത്തുനിന്നുണ്ടായ ആക്രമണങ്ങളും സമിതി അന്വേഷിക്കും.
കഴിഞ്ഞദിവസം രാത്രിയോടെ തലസ്ഥാന നഗരിയെ മണിക്കൂറുകളോളം യുദ്ധക്കളമാക്കിയ നിലയിലായിരുന്നു ഇരുവിഭാഗങ്ങളും തമ്മിലുള്ള ഏറ്റുമുട്ടൽ. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ നീക്കം ചെയ്യണമെന്ന് ആവശ്യപ്പെട്ട് യൂത്ത് കോൺഗ്രസ് സംഘടിപ്പിച്ച 'റെസിസ്റ്റൻസ് മാർച്ചി'നിടെയാണ് പ്രക്ഷോഭം അക്രമാസക്തമായത്. യൂണിവേഴ്സിറ്റി ഹോസ്റ്റൽ പരിസരത്തേക്ക് മാർച്ച് അടുത്തതോടെയാണ് പ്രശ്നങ്ങൾ ഉടലെടുത്തത്. മാർച്ചിന് നേരെ ഹോസ്റ്റൽ കെട്ടിടത്തിൽ നിന്നും കല്ലുകളും കുപ്പികളും വലിച്ചെറിഞ്ഞതാണ് അക്രമങ്ങൾക്ക് തിരികൊളുത്തിയതെന്ന് യൂത്ത് കോൺഗ്രസ് ആരോപിക്കുമ്പോൾ, യൂത്ത് കോൺഗ്രസ് പ്രവർത്തകരാണ് അക്രമത്തിന് തുടക്കമിട്ടതെന്ന് ഹോസ്റ്റലിലെ വിദ്യാർത്ഥികൾ വാദിക്കുന്നു. പ്രകടനത്തിൽ പങ്കെടുത്തവർ ഹോസ്റ്റൽ പരിസരത്തേക്ക് കത്തുന്ന തീപ്പന്തങ്ങൾ എറിഞ്ഞതോടെയാണ് സംഘർഷം ആളിക്കത്തിയത്.
തുടർന്ന് കാമ്പസിനകത്തേക്ക് അതിക്രമിച്ചു കയറിയ യൂത്ത് കോൺഗ്രസ് സംഘം അവിടെയുണ്ടായിരുന്ന ബോർഡുകളും കൊടിതോരണങ്ങളും തല്ലിത്തകർത്തു. ഇതോടെ ഇരുവിഭാഗങ്ങളും തെരുവിൽ പരസ്പരം കല്ലെറിയുകയും കയ്യാങ്കളിയിലേക്ക് നീങ്ങുകയും ചെയ്തതോടെ സ്ഥിതിഗതികൾ നിയന്ത്രണാതീതമായി. അരമണിക്കൂറിലധികം തലസ്ഥാന വീഥികളിൽ ഇരുവിഭാഗവും ഏറ്റുമുട്ടി. സംഭവത്തിൽ മ്യൂസിയം പോലീസ് ഇതിനോടകം രണ്ട് വ്യത്യസ്ത കേസുകൾ രജിസ്റ്റർ ചെയ്തിട്ടുണ്ട്. എസ്എഫ്ഐ, യൂത്ത് കോൺഗ്രസ് പ്രവർത്തകർക്കെതിരെ ജാമ്യമില്ലാ വകുപ്പുകൾ ചുമത്തിയാണ് പോലീസ് നടപടി സ്വീകരിച്ചിരിക്കുന്നത്.
