തിരുവനന്തപുരം: തലസ്ഥാനത്തെ യൂണിവേഴ്സിറ്റി കോളേജ് ഹോസ്റ്റൽ അങ്കണത്തിൽ അരങ്ങേറിയ സംഘർഷത്തിൽ സർക്കാരിന്റെയും പോലീസിന്റെയും പ്രവർത്തനങ്ങൾക്കെതിരെ രൂക്ഷമായ ഭാഷയിൽ പ്രതികരിച്ച് സിപിഐ സംസ്ഥാന സെക്രട്ടറി ബിനോയ് വിശ്വം. ഹോസ്റ്റൽ മുറികളിലേക്ക് ചെന്നായ്ക്കളെപ്പോലെ പാഞ്ഞുകയറി വിദ്യാർത്ഥികളെ ക്രൂരമായി മർദ്ദിക്കാൻ ഉത്തരവ് നൽകിയത് ആരാണെന്ന് അദ്ദേഹം ചോദിച്ചു. ഇതാണോ ഈ സർക്കാരിന്റെ ഔദ്യോഗിക പോലീസ് നയമെന്നും ബിനോയ് വിശ്വം തുറന്നടിച്ചു.
ഇത്തരം ക്രൂരതകൾ കേരളീയ സമൂഹം ഒരിക്കലും ക്ഷമിക്കില്ലെന്ന് അദ്ദേഹം മുന്നറിയിപ്പ് നൽകി. ബിജെപിയുമായുള്ള രാഷ്ട്രീയ സഖ്യം ഉൾപ്പെടെയുള്ള പല കാര്യങ്ങളും മൂടിവെക്കാനാണ് മുഖ്യമന്ത്രി ശ്രമിക്കുന്നത്. യൂത്ത് കോൺഗ്രസ് സമരം നയിച്ചത് ബിജെപിക്കെതിരെയാണെന്ന് കൊട്ടിഘോഷിക്കുമ്പോഴും അതിന്റെ പേരിൽ വേട്ടയാടപ്പെട്ടതും ഇരകളായതും എസ്എഫ്ഐ പ്രവർത്തകരാണ്. കേരളത്തിൽ അരങ്ങേറുന്ന കോൺഗ്രസ്-ബിജെപി അവിശുദ്ധ ബാന്ധവത്തിന്റെ ലജ്ജാകരമായ ഏടുകൾ മറച്ചുപിടിക്കാനാണ് ഈ നാടകങ്ങളെല്ലാം അരങ്ങേറുന്നത്. ബിജെപിയെ പ്രതിരോധിക്കാൻ എല്ലാവരും ഒറ്റക്കെട്ടായി നിലകൊള്ളണമെന്നാണ് രാഹുൽ ഗാന്ധി ഓർമ്മിപ്പിക്കുന്നത്; എന്നാൽ കേരളത്തിൽ നടക്കുന്നത് നേരെ വിപരീതമായ കാര്യങ്ങളാണ്. ഇവിടെ ബിജെപിയുടെ താല്പര്യങ്ങൾക്ക് വേണ്ടി കുഴലൂതുകയാണ് കോൺഗ്രസ് നേതൃത്വമെന്നും ബിനോയ് വിശ്വം ആരോപിച്ചു.
അതേസമയം, വിദ്യാർത്ഥികൾക്ക് നേരെയുണ്ടായ അതിക്രമത്തിൽ കന്റോൺമെന്റ് സിഐയ്ക്കും എസ്ഐയ്ക്കും നിർണ്ണായക പങ്കാളിത്തമുണ്ടെന്നും ഇവരെ അന്വേഷണത്തിൽ നിന്ന് മാറ്റിനിർത്തണമെന്നും മുൻ മന്ത്രി കെ. രാജൻ ആവശ്യപ്പെട്ടു. യൂണിവേഴ്സിറ്റി ഹോസ്റ്റലിന് മുന്നിൽ കെഎസ്‌‌യു, യൂത്ത് കോൺഗ്രസ് ജില്ലാ പ്രസിഡന്റുമാരുടെ നേരിട്ടുള്ള നേതൃത്വത്തിലാണ് അതിഭീകരമായ അക്രമസംഭവങ്ങൾ അഴിച്ചുവിട്ടതെന്നും അദ്ദേഹം കുറ്റപ്പെടുത്തി.
തലസ്ഥാന നഗരിയിൽ കണ്ടത് ഗുണ്ടാസംഘങ്ങളെ രംഗത്തിറക്കി മുൻകൂട്ടി പ്ലാൻ ചെയ്ത ആക്രമണമാണെന്നും, മുഖ്യമന്ത്രി വി.ഡി. സതീശന്റെ മുഖം രക്ഷിക്കാനാണ് ബോധപൂർവ്വം ഇത്തരമൊരു ഗൂഢാലോചന മെനഞ്ഞതെന്നും സിപിഐഎം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു.
