കണ്ണൂർ: മന്ത്രി ഒ.ജെ. ജനീഷ് സഞ്ചരിച്ച വാഹനത്തിന് നേരെ ആക്രമണം. സംഭവത്തിൽ മന്ത്രിയുടെ വാഹനത്തിന് കേടുപാടുകൾ സംഭവിച്ചു. കണ്ണൂരിലെ തളിപ്പറമ്പ് കുപ്പത്ത് വെച്ചായിരുന്നു പ്രതിഷേധക്കാർ വാഹനത്തിന് നേരെ അക്രമം അഴിച്ചുവിട്ടത്. കണ്ണൂരിലും കാസർഗോഡും മന്ത്രിക്കെതിരെ വ്യാപകമായി കരിങ്കൊടി പ്രതിഷേധങ്ങൾ അരങ്ങേറിയിരുന്നു.
അക്രമത്തിന് പിന്നിൽ ഡിവൈഎഫ്ഐ പ്രവർത്തകരാണെന്നാണ് കോൺഗ്രസിന്റെ ആരോപണം. കല്ലുകൾ കൊണ്ടും കൈകൾ കൊണ്ടും പ്രതിഷേധക്കാർ വാഹനത്തിൽ തുടർച്ചയായി ഇടിക്കുകയായിരുന്നുവെന്നും വാഹനത്തിലെ ദേശീയ പതാക സ്ഥാപിച്ചിരുന്ന സ്റ്റാൻഡ് തകർത്തതായും മന്ത്രി വ്യക്തമാക്കി. സ്ഥലത്തുണ്ടായിരുന്ന സുരക്ഷാ ജീവനക്കാരും പോലീസും ചേർന്നാണ് പ്രതിഷേധക്കാരെ തള്ളിമാറ്റി മന്ത്രിക്ക് വഴിയൊരുക്കിയത്.
അനിഷ്ട സംഭവങ്ങളുടെ പശ്ചാത്തലത്തിൽ മന്ത്രി ഒ.ജെ. ജനീഷിന്റെ സുരക്ഷാ സംവിധാനങ്ങൾ പോലീസ് കൂടുതൽ കർശനമാക്കിയിട്ടുണ്ട്. അദ്ദേഹം പങ്കെടുക്കുന്ന ഔദ്യോഗിക-പൊതുപരിപാടികളിലും യാത്രകളിലും അധിക പോലീസ് സേനയെ വിന്യസിക്കും. പൊതുവേദികളിൽ കൂടുതൽ പ്രതിഷേധ സാധ്യതകൾ നിലനിൽക്കുന്ന സാഹചര്യത്തിലാണ് ഈ അടിയന്തര നടപടി. സുരക്ഷാ മുൻകരുതലുകളുടെ ഭാഗമായി മന്ത്രിയുടെ ഓഫീസിലും പ്രത്യേക പോലീസ് നിരീക്ഷണം ഏർപ്പെടുത്തിയിട്ടുണ്ട്. യാത്രകളിലെ പോലീസ് സാന്നിധ്യം വർദ്ധിപ്പിക്കുന്നതിനൊപ്പം പൊതുപരിപാടികളിൽ കർശന സുരക്ഷാ ക്രമീകരണങ്ങളും നടപ്പിലാക്കും.
