ഇടുക്കി: തൊടുപുഴ അൽ അസ്ഹർ ലോ കോളേജ് യൂണിയൻ തെരഞ്ഞെടുപ്പിൽ കെഎസ്യു - യങ് ഡെമോക്രാറ്റ്സ് സംയുക്ത മുന്നണിക്ക് വിജയം. എസ്ഡിപിഐ അനുകൂല വിദ്യാർത്ഥി കൂട്ടായ്മയായ യങ് ഡെമോക്രാറ്റിന്റെ പ്രതിനിധികൾ കെഎസ്യുവിന്റെ പിന്തുണയോടെയാണ് മത്സരത്തിൽ വിജയിച്ചുകയറിയത്. അതേസമയം, കോളേജ് യൂണിയനിലെ സുപ്രധാന സ്ഥാനങ്ങളായ ചെയർമാൻ, വൈസ് ചെയർമാൻ, ജനറൽ സെക്രട്ടറി പദവികളിൽ എസ്എഫ്ഐ സ്ഥാനാർത്ഥികൾ വിജയം ഉറപ്പിച്ചു. ടൈ ആയതിനെത്തുടർന്ന് നറുക്കെടുപ്പിലൂടെയാണ് ഈ പ്രധാന സീറ്റുകളിലെ വിജയികളെ നിർണ്ണയിച്ചത്.
എംജി സർവകലാശാലാ യൂണിയൻ തെരഞ്ഞെടുപ്പിൽ ഇടുക്കി ജില്ലയിൽ ഉടനീളം എസ്എഫ്ഐ മികച്ച ആധിപത്യം സ്ഥാപിച്ചു. ജില്ലയിൽ തെരഞ്ഞെടുപ്പ് നടന്ന ആകെയുള്ള 27 ക്യാമ്പസുകളിൽ 22 ഇടങ്ങളിലും എസ്എഫ്ഐ യൂണിയൻ സ്വന്തമാക്കി. ഇതിൽ മൂന്ന് കോളേജുകൾ കെഎസ്യുവിൽ നിന്ന് എസ്എഫ്ഐ പിടിച്ചെടുത്തവയാണ്. മൂലമറ്റം സെന്റ് ജോസഫ് കോളേജ്, മുട്ടം ഐഎച്ച്ആർഡി കോളേജ്, അടിമാലി കാർമൽ ഗിരി കോളേജ് എന്നിവയാണ് കെഎസ്യുവിൽ നിന്ന് എസ്എഫ്ഐ തിരികെ പിടിച്ച ക്യാമ്പസുകൾ. എന്നാൽ പെരുവന്താനം സെന്റ് ആന്റണീസ് കോളേജ് എസ്എഫ്ഐയിൽ നിന്ന് തിരിച്ചുപിടിക്കാൻ കെഎസ്യുവിന് സാധിച്ചു. മുരിക്കാശ്ശേരി പാവനാത്മ കോളേജ്, രാജമുടി മാർസ്ലീവാ കോളേജ് എന്നിവിടങ്ങളിൽ കെഎസ്യു യൂണിയൻ ഭരണം നിലനിർത്തുകയും ചെയ്തു.
