കോഴിക്കോട്: തദ്ദേശ ഉപതെരഞ്ഞെടുപ്പിലുണ്ടായ തിരിച്ചടിയുടെ പശ്ചാത്തലത്തിൽ യുഡിഎഫ് സർക്കാരിന് ശക്തമായ മുന്നറിയിപ്പുമായി സമസ്തയുടെ മുഖപത്രമായ 'സുപ്രഭാതം' മുഖപ്രസംഗം. ഭരണത്തിന്റെ പ്രാരംഭ ഘട്ടത്തിൽത്തന്നെ ജനങ്ങളുടെ മനസ്സിൽ രൂപപ്പെട്ട പ്രതിച്ഛായയെക്കുറിച്ച് യുഡിഎഫ് കൃത്യമായ ആത്മപരിശോധന നടത്തണമെന്ന് സമസ്ത ആവശ്യപ്പെടുന്നു. മുന്നണിയുടെ കൈവശമുണ്ടായിരുന്ന സിറ്റിംഗ് സീറ്റുകൾ നഷ്ടമായത് കൂടാതെ, ജയിച്ച വാർഡുകളിലും പരാജയപ്പെട്ട ഇടങ്ങളിലും വോട്ട് വിഹിതത്തിൽ വൻ ഇടിവ് സംഭവിച്ചതായും എഡിറ്റോറിയൽ ചൂണ്ടിക്കാട്ടുന്നു.
ഉപതെരഞ്ഞെടുപ്പ് നടന്നതിൽ 22 സിറ്റിംഗ് സീറ്റുകളുണ്ടായിരുന്ന യുഡിഎഫിന് മൂന്ന് വാർഡുകൾ നഷ്ടപ്പെടുകയുണ്ടായി. ചിറയിൻകീഴിൽ ഉയർന്നുവന്ന കോൺഗ്രസ് കയ്യാങ്കളി വിവാദങ്ങളാണ് അവിടെയുണ്ടായ പരാജയത്തിന് വഴിതുറന്നതെന്നും പത്രം വിലയിരുത്തുന്നു. തദ്ദേശ വാർഡുകളിലെ ഉപതെരഞ്ഞെടുപ്പ് ഫലം മാത്രം കണക്കിലെടുത്ത് സർക്കാരിന്റെ മൊത്തത്തിലുള്ള ജനപിന്തുണ അളക്കാൻ സാധ്യമല്ലെങ്കിലും, ഈ ജനവിധി മുന്നോട്ടുവെക്കുന്ന രാഷ്ട്രീയ സന്ദേശത്തെ ലാഘവത്തോടെ തള്ളിക്കളയുന്നത് ഉചിതമല്ലെന്നാണ് സമസ്തയുടെ നിലപാട്. കേവലം നാല് മാസത്തെ ഭരണം കൊണ്ട് സർക്കാരിന്റെ തിളക്കത്തിന് എങ്ങനെ മങ്ങലേറ്റു എന്നും, ഉയർന്നുവന്ന വിവാദങ്ങളിൽ ജനങ്ങൾക്ക് ബോധ്യമാകുന്ന വിധത്തിലുള്ള വ്യക്തമായ മറുപടി നൽകാൻ ഭരണ നേതൃത്വത്തിന് സാധിച്ചോ എന്നും മുഖപ്രസംഗം ഗൗരവമായി ചോദിക്കുന്നു.
ഇത്തരമൊരു സാഹചര്യം സാധാരണക്കാരായ ജനങ്ങൾക്കിടയിൽ സന്ദേഹം ഉളവാക്കിയിട്ടുണ്ടെങ്കിൽ അവരെ കുറ്റപ്പെടുത്താൻ കഴിയില്ല. സർക്കാരിനെ വലയം ചെയ്തുണ്ടായ വൻ വിവാദങ്ങൾ ഭരണസുതാര്യതയെക്കുറിച്ചുള്ള സംശയങ്ങൾക്കാണ് തിരികൊളുത്തിയത്. അധികാരത്തിൽ തുടരുന്നവർ വ്യക്തിപരമായ സൗകര്യങ്ങൾ കൈപ്പറ്റുമ്പോൾ പുലർത്തേണ്ട സുതാര്യത സംബന്ധിച്ച ചോദ്യങ്ങൾ ഇനിയും ബാക്കിയാണ്. ജനങ്ങൾ വച്ചുനീട്ടുന്ന പിന്തുണ എക്കാലത്തേക്കുമുള്ള ഭരണാവകാശമല്ലെന്ന് തിരിച്ചറിയണം. വിവാദങ്ങളെ പാഠമായി ഉൾക്കൊള്ളാൻ തയ്യാറാകണം; ജനവിധിയിലുണ്ടാകുന്ന ചെറിയ മാറ്റങ്ങൾ പലപ്പോഴും വരാനിരിക്കുന്ന വലിയ രാഷ്ട്രീയ പ്രതിഫലനങ്ങളുടെ മുന്നോടിയാകാറുണ്ടെന്ന് എഡിറ്റോറിയൽ ഓർമ്മിപ്പിക്കുന്നു.
വ്യക്തിപരമായ ആനുകൂല്യങ്ങളും സൗകര്യങ്ങളും വിനിയോഗിക്കുന്നതിൽ സർക്കാർ കൂടുതൽ സുതാര്യത കാത്തുസൂക്ഷിക്കണം. നയപരമായ തീരുമാനങ്ങളിൽ പൂർണ്ണമായ വ്യക്തതയുണ്ടാകണമെന്ന് സമസ്ത മുന്നറിയിപ്പ് നൽകുന്നു. മാധ്യമങ്ങളോടും വിമർശകരോടും കൂടുതൽ ജനാധിപത്യപരമായ സമീപനമാണ് സർക്കാർ സ്വീകരിക്കേണ്ടത്. ഭരണാധികാരവും സ്വകാര്യ താല്പര്യങ്ങളും തമ്മിലുള്ള അതിർവരമ്പുകൾ കർശനമായി കാത്തുസൂക്ഷിക്കണമെന്നും, ഭരണസംവിധാനത്തെ കൂടുതൽ മെച്ചപ്പെടുത്താനുള്ള ഗുണപരമായ നിർദ്ദേശങ്ങളാണ് തങ്ങൾ മുന്നോട്ടുവെക്കുന്നതെന്നും മുഖപ്രസംഗത്തിൽ വ്യക്തമാക്കുന്നു.
