തിരുവനന്തപുരം: സംസ്ഥാനത്ത് പ്രതിഷേധങ്ങൾ രൂക്ഷമാകുന്ന സാഹചര്യം മുൻനിർത്തി മുഖ്യമന്ത്രി വി.ഡി. സതീശന്റെ സുരക്ഷാ ക്രമീകരണങ്ങൾ ശക്തിപ്പെടുത്താൻ തീരുമാനം. മുഖ്യമന്ത്രി സംബന്ധിക്കുന്ന പൊതുപരിപാടികളിൽ ഇനിമുതൽ കൂടുതൽ പോലീസ് ഉദ്യോഗസ്ഥരെ കാവലിനായി നിയോഗിക്കും.
യാത്രാവേളകളിൽ പൈലറ്റ്, എസ്കോർട്ട് വാഹനങ്ങൾ മാത്രമായിരിക്കും അകമ്പടിയായി ഉണ്ടാകുക. ഇന്ന് തലസ്ഥാനത്ത് നടക്കുന്ന മുഖ്യമന്ത്രിയുടെ ഔദ്യോഗിക ചടങ്ങുകളിൽ കൂടുതൽ സുരക്ഷാ സേനയെ വിന്യസിക്കും. മന്ത്രിമാരുടെ സുരക്ഷയും വർദ്ധിപ്പിക്കാൻ ധാരണയായിട്ടുണ്ട്. സുരക്ഷാ സന്നാഹങ്ങൾ വർദ്ധിപ്പിക്കണമെന്ന് ആവശ്യപ്പെട്ട് ഇന്റലിജൻസ് മേധാവി ജില്ലാ പോലീസ് മേധാവിമാർക്ക് നിർദ്ദേശം നൽകിയിരുന്നു.
നിയന്ത്രണമില്ലാതെ ജനക്കൂട്ടം മുഖ്യമന്ത്രിക്ക് അരികിലേക്ക് എത്തുകയും അദ്ദേഹത്തിന്റെ ശരീരത്തിൽ സ്പർശിക്കുന്ന തലത്തിൽ അടുത്തിടപഴകുകയും ചെയ്യുന്ന സാഹചര്യം ഒഴിവാക്കാൻ അതീവ ജാഗ്രത പുലർത്തണമെന്നാണ് നിർദ്ദേശത്തിലുള്ളത്. പൊതുവേദികളിലും യാത്രാവഴികളിലും യൂണിഫോം ധരിച്ച പോലീസുകാർക്ക് ഒപ്പം മഫ്തി പോലീസുകാരെയും കാവലിനായി നിയോഗിക്കണമെന്ന് ഇന്റലിജൻസ് മേധാവി വ്യക്തമാക്കിയിട്ടുണ്ട്.
എന്നാൽ, തനിക്ക് അധിക സുരക്ഷ ഏർപ്പെടുത്തുന്നതിനോട് യോജിപ്പില്ലെന്നാണ് മുഖ്യമന്ത്രിയുടെ വ്യക്തിപരമായ നിലപാട്. തിരുവനന്തപുരത്ത് ചടങ്ങിൽ പങ്കെടുക്കാൻ എത്തിയപ്പോൾ അദ്ദേഹം പോലീസിനോട് ഇതിലുള്ള അതൃപ്തി വ്യക്തമാക്കുകയും ചെയ്തിരുന്നു. തിരുവനന്തപുരം ഡിസിപിയോടാണ് മുഖ്യമന്ത്രി ഇക്കാര്യം നേരിട്ട് സംസാരിച്ചത്. ഔദ്യോഗിക യാത്രകളിൽ അധികമായി വാഹനങ്ങൾ ഉൾപ്പെടുത്തരുതെന്നും അദ്ദേഹം നിർദ്ദേശിച്ചിട്ടുണ്ട്.
അതേസമയം, മുഖ്യമന്ത്രിക്കും മന്ത്രിമാർക്കും എതിരെയുള്ള കരിങ്കൊടി പ്രക്ഷോഭം യുവമോർച്ച ശക്തമായി തുടരുകയാണ്. ഇന്നലെ അർദ്ധരാത്രിയിലും തലസ്ഥാനത്ത് മുഖ്യമന്ത്രിയുടെ വാഹനവ്യൂഹത്തിന് നേരെ പ്രതിഷേധമുണ്ടായി. പുലർച്ചെ 12.45-ന് ചാക്ക പാലത്തിന് സമീപമായിരുന്നു സംഭവം. യുവമോർച്ച ജില്ലാ പ്രസിഡന്റ് വിഷ്ണു ആചാരി ഉൾപ്പെടെ മൂന്ന് പ്രവർത്തകരെ പോലീസ് കസ്റ്റഡിയിലെടുത്തിട്ടുണ്ട്. കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ നടന്ന പ്രതിഷേധത്തിൽ കൃത്യമായ അന്വേഷണം പ്രഖ്യാപിക്കുന്നതുവരെ സമരവുമായി മുന്നോട്ടുപോകുമെന്ന ഉറച്ച നിലപാടിലാണ് ബിജെപി.
