കൊച്ചി: എംജി സർവകലാശാലയ്ക്ക് കീഴിലുള്ള കോളേജുകളിൽ നടന്ന യൂണിയൻ തെരഞ്ഞെടുപ്പിൽ എസ്എഫ്ഐക്ക് ഉജ്ജ്വല വിജയം. തെരഞ്ഞെടുപ്പ് പൂർത്തിയായ 117 ക്യാമ്പസുകളിൽ 98 ഇടങ്ങളിലും യൂണിയൻ ഭരണം എസ്എഫ്ഐ സ്വന്തമാക്കി. ജില്ലാടിസ്ഥാനത്തിൽ കോട്ടയത്തെ 32-ൽ 27 കോളേജുകളിലും പത്തനംതിട്ടയിലെ 16-ൽ 15 കാമ്പസുകളിലും എസ്എഫ്ഐ ആധിപത്യം ഉറപ്പിച്ചു. എറണാകുളത്ത് ആകെ നടന്ന 41-ൽ 33 ഇടങ്ങളിലും ഇടുക്കിയിൽ 27-ൽ 22 കോളേജുകളിലും സംഘടന ജയിച്ചുകയറി. ആറ് വർഷത്തെ ഇടവേളയ്ക്ക് ശേഷം ആലുവ യുസി കോളേജ് കെഎസ്‌‌യുവിൽ നിന്ന് തിരിച്ചുപിടിക്കാൻ കഴിഞ്ഞത് എസ്എഫ്ഐക്ക് ഇരട്ടി മധുരമായി.

കോട്ടയം സിഎംഎസ് കോളേജും കെഎസ്‌യുവിൽ നിന്ന് എസ്എഫ്ഐ പിടിച്ചെടുത്തു. ഇതിനുപുറമെ അരുവിത്തുറ സെന്റ് ജോർജ് കോളേജ്, പുലരിക്കുന്ന് സ്റ്റാർസ് കോളേജ് എന്നിവിടങ്ങളിലും ശ്രദ്ധേയമായ അട്ടിമറി വിജയമാണ് എസ്എഫ്ഐ കുറിച്ചത്. എറണാകുളം മഹാരാജാസ് കോളേജിലെ മുഴുവൻ 14 സീറ്റുകളിലും തുടർച്ചയായ നാലാം തവണയും സമ്പൂർണ്ണ വിജയം നേടി സംഘടന മേൽക്കൈ ഉറപ്പിച്ചു. പത്തനംതിട്ട കാതോലിക്കേറ്റ് കോളേജും എസ്എഫ്ഐ തിരികെ പിടിച്ച ക്യാമ്പസുകളുടെ പട്ടികയിലുണ്ട്.

അതേസമയം, തേവര സേക്രഡ് ഹാർട്ട് (എസ്എച്ച്) കോളേജിൽ തുടർച്ചയായ ആറാം തവണയും വിജയിച്ച് കെഎസ്‌യു തങ്ങളുടെ ശക്തി തെളിയിച്ചു. സംസ്ഥാന പ്രസിഡന്റ് അലോഷ്യസ് സേവ്യറിന്റെ സ്വന്തം കാമ്പസ് ആയതിനാൽ അദ്ദേഹം നേരിട്ടെത്തിയാണ് ഇവിടെ തെരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകിയത്. കോട്ടയം ബസേലിയസ് കോളേജിൽ ഭരണം നിലനിർത്തിയ കെഎസ്‌യു, പെരുന്താനം സെന്റ് ആന്റണീസ് കോളേജ് എസ്എഫ്ഐയിൽ നിന്ന് പിടിച്ചെടുക്കുകയും ചെയ്തു.

ഇതിനിടെ, കാഞ്ഞിരപ്പള്ളി എസ്ഡി കോളേജിലെ തെരഞ്ഞെടുപ്പ് ഫലപ്രഖ്യാപനം മാറ്റിവെച്ചു. സർവകലാശാല വൈസ് ചാൻസലറുടെ ഓഫീസിൽ നിന്നുള്ള പ്രത്യേക നിർദ്ദേശപ്രകാരമാണ് ഈ നടപടി. യൂണിയൻ ഭാരവാഹിത്വത്തിലേക്കുള്ള നോമിനേഷൻ സമർപ്പിക്കാൻ കെഎസ്‌യു പ്രവർത്തകർ എത്തിയത് സമയം വൈകിയാണെന്ന കാരണത്താൽ കോളേജ് അധികൃതർ പത്രിക സ്വീകരിച്ചിരുന്നില്ല. തുടർന്ന് വിസിയുടെ ഇടപെടലിനെത്തുടർന്ന് തെരഞ്ഞെടുപ്പ് പ്രക്രിയ താത്കാലികമായി നിർത്തിവെക്കുകയായിരുന്നു. സംഭവത്തിന് പിന്നാലെ കോളേജ് പരിസരത്ത് എസ്എഫ്ഐ-കെഎസ്‌യു പ്രവർത്തകർ തമ്മിൽ രൂക്ഷമായ സംഘർഷം അരങ്ങേറുകയും കെഎസ്‌യു ജില്ലാ പ്രസിഡന്റ് നൈസാമിന്റെ തലയ്ക്ക് പരിക്കേൽക്കുകയും ചെയ്തു.