തിരുവനന്തപുരം: തലസ്ഥാന ജില്ലയിലെ നെയ്യാറ്റിൻകരയ്ക്ക് സമീപം കോൺഗ്രസിന്റെ മണ്ഡലം കമ്മിറ്റി ഓഫീസിന് നേരെ തീവെപ്പ് ആക്രമണം. പാലിയോട് ജംഗ്ഷനിൽ സ്ഥിതി ചെയ്യുന്ന ആനാവൂർ മണ്ഡലം കമ്മിറ്റി ഓഫീസാണ് അക്രമികൾ തീയിട്ട് നശിപ്പിച്ചത്. സംഭവത്തിൽ ഓടുമേഞ്ഞ പഴയ കെട്ടിടത്തിന്റെ ഭാഗങ്ങൾക്കും ഓഫീസിന് മുന്നിലെ പ്രചാരണ ഫ്ലക്സ് ബോർഡുകൾക്കും നാശനഷ്ടമുണ്ടായി. അക്രമം വ്യക്തമാക്കുന്ന സിസിടിവി ദൃശ്യങ്ങൾ റിപ്പോർട്ടറിന് ലഭ്യമായിട്ടുണ്ട്.
രാത്രി സമയത്ത് പാർട്ടി ഓഫീസിന്റെ പിൻഭാഗം വഴി കടന്നുകൂടിയ അജ്ഞാത സംഘമാണ് അതിക്രമത്തിന് പിന്നിൽ പ്രവർത്തിച്ചത്. കൈവശം കരുതിയിരുന്ന ദ്രാവകം ഫ്ലക്സ് ബോർഡുകളിലേക്ക് ഒഴിച്ച ശേഷമാണ് സംഘം തീ കൊളുത്തിയത്. മുൻ മുഖ്യമന്ത്രി ഉമ്മൻചാണ്ടിയുടെയും നിലവിലെ മുഖ്യമന്ത്രി വി.ഡി. സതീശന്റെയും ചിത്രങ്ങളടങ്ങിയ ഫ്ലക്സ് ബോർഡുകൾ പൂർണ്ണമായി കത്തിയമർന്നു.
തീ പടരുന്നത് ശ്രദ്ധയിൽപ്പെട്ട നാട്ടുകാർ സമയോചിതമായി ഇടപെട്ട് തീയണച്ചതിനാലാണ് സമീപത്തെ മറ്റ് കെട്ടിടങ്ങളിലേക്ക് അഗ്നി പടരാതിരുന്നതും വൻ ദുരന്തം ഒഴിവായതും. നാട്ടുകാർ വിവരമറിയിച്ചതിനെ തുടർന്ന് പോലീസ് സ്ഥലത്തെത്തി. കഴിഞ്ഞ ദിവസം ഈ മേഖലയിൽ ബിജെപി-യൂത്ത് കോൺഗ്രസ് പ്രവർത്തകർ തമ്മിൽ രൂക്ഷമായ തർക്കം അരങ്ങേറിയിരുന്നു. ഇതിന്റെ തുടർച്ചയായി ഉണ്ടായ വൈരാഗ്യമാണോ ആക്രമണത്തിന് കാരണമെന്ന കാര്യത്തിൽ മാരായമുട്ടം പോലീസ് വിശദമായ അന്വേഷണം ആരംഭിച്ചിട്ടുണ്ട്.
