വടകര: ലഹരിക്കേസിലെ രണ്ടാം പ്രതിയായ കീർത്തനയെ ലിവിങ് ടുഗെദർ പങ്കാളി വെട്ടിപ്പരിക്കേൽപ്പിച്ച സംഭവത്തിൽ കൂടുതൽ വിവരങ്ങൾ പുറത്ത്. കീർത്തന തനിക്കെതിരെ ക്വട്ടേഷൻ നൽകിയതായി പങ്കാളി പെരുവണ്ണാമൂഴി സ്വദേശി ജെനീഷ് പോലീസിനോട് വെളിപ്പെടുത്തി. ക്വട്ടേഷൻ സംഘം തന്നെ ആക്രമിക്കാൻ തുനിഞ്ഞതിലുള്ള കടുത്ത പ്രതികാരമാണ് കീർത്തനയെ വെട്ടാൻ കാരണമെന്നാണ് പ്രതിയുടെ കുറ്റസമ്മത മൊഴി. അവസരത്തിനായി കാത്തുനിന്ന ശേഷമാണ് ആക്രമണം നടത്തിയതെന്നും ഇയാൾ സമ്മതിച്ചിട്ടുണ്ട്. വെട്ടേറ്റ് മാരകമായി പരിക്കേറ്റ കീർത്തന ഇപ്പോൾ ആശുപത്രിയിൽ ചികിത്സയിലാണ്.
സമൂഹമാധ്യമങ്ങൾ വഴി തനിക്കെതിരെ അപകീർത്തികരമായ കാര്യങ്ങൾ കീർത്തന പോസ്റ്റ് ചെയ്തത് കടുത്ത പ്രകോപനത്തിന് ഇടയാക്കിയെന്ന് പ്രതി നേരത്തെ മൊഴി നൽകിയിരുന്നു. കഴിഞ്ഞ ഒരാഴ്ചയോളമായി കത്തിയുമായി കീർത്തനയെ വകവരുത്താൻ തക്കം പാർത്തിരിക്കുകയായിരുന്നുവെന്നാണ് ഇയാൾ പോലീസിനോട് പറഞ്ഞത്. കൊലപ്പെടുത്തുക എന്ന വ്യക്തമായ ഉദ്ദേശ്യത്തോടെ തന്നെയാണ് കൃത്യം നിർവഹിച്ചതെന്നും പ്രതി വ്യക്തമാക്കി. ജെനീഷും കീർത്തനയും ഒരുമിച്ചായിരുന്നു താമസം; ഇയാളെ നിലവിൽ പോലീസ് കസ്റ്റഡിയിലെടുത്തിട്ടുണ്ട്.
ശനിയാഴ്ച രാവിലെ വടകര പോലീസ് സ്റ്റേഷൻ പരിസരത്തുവെച്ചായിരുന്നു ആക്രമണം അരങ്ങേറിയത്. ഹൈക്കോടതി നിഷ്കർഷിച്ച ജാമ്യവ്യവസ്ഥകളുടെ ഭാഗമായി വടകര പോലീസ് സ്റ്റേഷനിൽ ഒപ്പിടാൻ എത്തിയതായിരുന്നു കീർത്തന. ആക്രമണത്തിൽ കുത്തേറ്റ ഇവരെ ആദ്യം വടകര താലൂക്ക് ആശുപത്രിയിലാണ് എത്തിച്ചത്; തുടർന്ന് പ്രാഥമിക ചികിത്സ നൽകിയ ശേഷം കൂടുതൽ വിദഗ്ദ്ധ പരിചരണത്തിനായി കോഴിക്കോട് മെഡിക്കൽ കോളേജിലേക്ക് മാറ്റുകയായിരുന്നു. മുൻപ് മറ്റ് ക്രിമിനൽ പശ്ചാത്തലങ്ങളൊന്നുമില്ലെന്ന കാര്യം പരിഗണിച്ച് ഇക്കഴിഞ്ഞ സെപ്റ്റംബർ അഞ്ചിനാണ് കർശന ഉപാധികളോടെ ഹൈക്കോടതി കീർത്തനയ്ക്ക് ജാമ്യം അനുവദിച്ചത്. അന്വേഷണവുമായി പൂർണ്ണമായി സഹകരിക്കണമെന്നും കോടതി അന്ന് ഉത്തരവിട്ടിരുന്നു.
