തിരുവനന്തപുരം: മുഖ്യമന്ത്രി വി.ഡി. സതീശൻ നടത്തിയ വിവാദ ചാർട്ടേഡ് വിമാനയാത്രയിൽ കോൺഗ്രസ് നേതൃത്വത്തിൽ കടുത്ത അതൃപ്തി. വിഷയത്തെ കൂടുതൽ ഗൗരവത്തിലും പക്വതയോടെയും കൈകാര്യം ചെയ്യണമായിരുന്നുവെന്നാണ് പാർട്ടിക്കുള്ളിൽ നിന്നുയരുന്ന വിമർശനം. യാത്രയ്ക്കുള്ള തുക നൽകിയത് മലയാളിയായ ഒരു സുഹൃത്താണെന്ന് മുഖ്യമന്ത്രി വ്യക്തമാക്കിയെങ്കിലും, ആ വ്യക്തിയുടെ പേര് വെളിപ്പെടുത്താൻ തയ്യാറാകാതിരുന്നത് പൊതുജനങ്ങൾക്കിടയിൽ വലിയ സംശയങ്ങൾക്ക് വഴിവെച്ചതായി നേതൃത്വം കരുതുന്നു. മുഖ്യമന്ത്രിയുടെ ഭാഗത്തുനിന്നുണ്ടായ പ്രതികരണം അനാവശ്യമായിരുന്നുവെന്നും വിലയിരുത്തപ്പെടുന്നുണ്ട്. പുതിയ സർക്കാർ അധികാരത്തിലേറി വെറും നാല് മാസം പിന്നിടുമ്പോൾ ഉയർന്ന ഇത്തരം വിവാദങ്ങൾ ഭരണനേട്ടങ്ങളുടെ മാറ്റുകുറയ്ക്കുമെന്നും ജനങ്ങളിലേക്ക് തെറ്റായ സന്ദേശം നൽകുമെന്നുമാണ് കോൺഗ്രസിലെ പൊതുവികാരം.

കർണാടക ആസ്ഥാനമായുള്ള കേളചന്ദ്ര ഗ്രൂപ്പിന്റെ ഉടമസ്ഥതയിലുള്ള വിമാനത്തിലായിരുന്നു മുഖ്യമന്ത്രി വി.ഡി. സതീശൻ തിരുവനന്തപുരത്തുനിന്ന് മലപ്പുറത്തേക്ക് പറന്നത്. സർക്കാർ കരാർ പുതുക്കാനായി അപേക്ഷ സമർപ്പിച്ച് അനുമതി കാത്തിരിക്കുന്ന ചിപ്‌സൺ ഏവിയേഷനാണ് ഈ വിമാനയാത്രയ്ക്കുള്ള പണം കൈമാറിയത്. നാല് മണിക്കൂർ നീണ്ട ആകാശയാത്രയ്ക്കായി ആകെ 19,88,595 രൂപയാണ് ചെലവായത്. വിഷയം വലിയ രാഷ്ട്രീയ വിവാദമായി മാറിയതോടെ പത്രസമ്മേളനത്തിൽ മാധ്യമങ്ങൾ ഇതേക്കുറിച്ച് ആരാഞ്ഞപ്പോൾ, യാത്ര സ്പോൺസർഷിപ്പിലൂടെയാണെന്നും മലയാളിയായ ഒരു സുഹൃത്താണ് തുക വഹിച്ചതെന്നുമായിരുന്നു വി.ഡി. സതീശന്റെ മറുപടി. എന്നാൽ സ്പോൺസർ ആരാണെന്ന് മാധ്യമങ്ങൾ വീണ്ടും ആരാഞ്ഞെങ്കിലും പേര് വെളിപ്പെടുത്താൻ അദ്ദേഹം കൂട്ടാക്കിയില്ല. സുഹൃത്തിനെ അനാവശ്യമായി വിവാദങ്ങളിലേക്ക് വലിച്ചിഴക്കാൻ ആഗ്രഹിക്കുന്നില്ലെന്ന നിലപാടാണ് മുഖ്യമന്ത്രി സ്വീകരിച്ചത്.

കഴിഞ്ഞ സെപ്റ്റംബർ 21-നായിരുന്നു സതീശന്റെ വിവാദമായ മലപ്പുറം യാത്ര. മലപ്പുറം ജില്ലയിലുണ്ടായ കനത്ത മഴക്കെടുതികളും മലവെള്ളപ്പാച്ചിലിലെ നാശനഷ്ടങ്ങളും നേരിട്ട് കണ്ട് വിലയിരുത്താനായിരുന്നു ഈ സന്ദർശനം. ചാർട്ടേഡ് വിമാനം ഉപയോഗിച്ചതിൽ വലിയ ധൂർത്ത് ആരോപിക്കപ്പെട്ടതോടെ മുഖ്യമന്ത്രിയുടെ ഓഫീസ് വിശദീകരണവുമായി രംഗത്തെത്തി. ചാർട്ടേഡ് ഫ്ലൈറ്റിന്റെ ചിലവ് ഒരു സ്പോൺസറാണ് വഹിച്ചതെന്നും ഇതിലൂടെ ഖജനാവിന് ഒരു രൂപയുടെ പോലും അധികച്ചെലവ് വന്നിട്ടില്ലെന്നുമായിരുന്നു വിശദീകരണം. കരിപ്പൂരിലേക്ക് നേരിട്ട് യാത്രാവിമാനങ്ങൾ ലഭ്യമല്ലാത്തതിനാലാണ് പ്രത്യേക വിമാനം ഏർപ്പാടാക്കേണ്ടി വന്നതെന്നും ഓഫീസ് അറിയിച്ചു. എന്നാൽ ഈ വിശദീകരണത്തിന് പിന്നാലെ സ്പോൺസർ ആരെന്ന് ചോദ്യങ്ങളുയരുകയും പ്രതിപക്ഷം വിഷയം ശക്തമായി ഏറ്റെടുക്കുകയും ചെയ്തു. ഒടുവിൽ ചിപ്‌സൺ ഏവിയേഷന്റെ പങ്ക് പുറത്തുവന്നതോടെ പ്രതിപക്ഷം സർക്കാരിനെതിരായ ആക്രമണം കടുപ്പിച്ചു. കരാർ പുതുക്കാനുള്ള അപേക്ഷ സർക്കാരിന്റെ പരിഗണനയിലിരിക്കെ ചിപ്‌സൺ ഏവിയേഷൻ പണം മുടക്കി നടത്തിയ യാത്രയ്ക്ക് പിന്നിൽ ഗൂഢലക്ഷ്യങ്ങളുണ്ടെന്നും, ഇത് എന്തെങ്കിലും പ്രത്യേക കാര്യങ്ങൾക്കുള്ള പ്രത്യുപകാരമാണോ എന്നും പ്രതിപക്ഷം ആരോപണമുന്നയിച്ചു.