കൊച്ചി: മുണ്ടംവേലി ലൈഫ് മിഷൻ ഫ്ലാറ്റിന്റെ ബലക്ഷയവുമായി ബന്ധപ്പെട്ട് ഉയർന്ന രാഷ്ട്രീയ വിവാദങ്ങളിൽ പ്രതികരണവുമായി മുൻ എംഎൽഎ കെ.ജെ. മാക്സി. ദുരിതപൂർണ്ണമായ ജീവിതസാഹചര്യങ്ങളിൽ കഴിഞ്ഞിരുന്ന നിർധന കുടുംബങ്ങൾക്ക് സുരക്ഷിതമായ പാർപ്പിടം ഒരുക്കിനൽകിയത് ഇടതുപക്ഷ ജനാധിപത്യ മുന്നണി സർക്കാരാണ്. ഒന്നുമില്ലാതിരുന്ന പാവങ്ങൾക്ക് എല്ലാവിധ സൗകര്യങ്ങളും ചെയ്തുകൊടുത്തത് എൽഡിഎഫ് സർക്കാരായിരുന്നു; എന്നാൽ ഭരണം മാറിയതോടെ ഫ്ലാറ്റിലെ താമസക്കാരുടെ നിലപാടിലും മാറ്റം വന്നുവെന്ന് അദ്ദേഹം കുറ്റപ്പെടുത്തി. വിഷയത്തിൽ വിജിലൻസ് അന്വേഷണം നടക്കുന്നതിനെ സ്വാഗതം ചെയ്യുന്നതായും എന്നാൽ നിലവിൽ അരങ്ങേറുന്നത് തനി രാഷ്ട്രീയ പകപോക്കലാണെന്നും മാക്സി ആരോപിച്ചു.
കൃത്യമായ പരിശോധനകൾ നടത്തിയ ശേഷമാണ് കെട്ടിട നിർമ്മാണം ആരംഭിച്ചത്. തുടർന്ന് എന്തെങ്കിലും പോരായ്മകൾ ശ്രദ്ധയിൽപ്പെട്ടപ്പോൾ തന്നെ അവ പരിഹരിക്കാനുള്ള നടപടികൾ സ്വീകരിച്ചിരുന്നു. എന്നാൽ ഫ്ലാറ്റ് സമുച്ചയം പൂർണ്ണമായി പൊളിച്ചുനീക്കണമെന്ന മുഖ്യമന്ത്രി വി.ഡി. സതീശന്റെ ആവശ്യം തികച്ചും രാഷ്ട്രീയ പ്രേരിതമാണ്. സമുച്ചയം പൊളിച്ചുമാറ്റാതെ തന്നെ അറ്റകുറ്റപ്പണികളിലൂടെ പ്രശ്നങ്ങൾ പരിഹരിക്കാൻ സാധിക്കും. പുതിയ സർക്കാർ നിലവിൽ വന്നതോടെ പുനരധിവാസം വേണമെന്ന് വാദിക്കുന്ന ചില താമസക്കാർ നിലപാട് മാറ്റി രാഷ്ട്രീയ നേട്ടങ്ങൾക്കായി കോൺഗ്രസ് നേതാക്കളെ കൂട്ടുപിടിക്കുകയാണെന്നും അദ്ദേഹം പറഞ്ഞു. കോടികൾ ചിലവിട്ട് പടുത്തുയർത്തിയ ഒരു നിർമ്മിതി യാഥാർത്ഥ്യങ്ങൾ മനസ്സിലാക്കാതെ തകർത്തു കളയണമെന്ന് പറയുന്നത് അംഗീകരിക്കാനാകില്ല.
ഇടതുപക്ഷ സർക്കാർ നടപ്പിലാക്കിയ വികസന പ്രവർത്തനങ്ങളെല്ലാം മോശമാണെന്ന് ചിത്രീകരിക്കാനുള്ള ആസൂത്രിത ശ്രമമാണിതിന് പിന്നിൽ. ജനങ്ങളെല്ലാം സുരക്ഷിതമായി ജീവിക്കണമെന്നാണ് തങ്ങളുടെ പക്ഷം. ചോർച്ച അടക്കമുള്ള ന്യൂനതകൾ പരിഹരിച്ച് അറ്റകുറ്റപ്പണികൾ പൂർത്തിയാക്കാനുള്ള നടപടികളാണ് മുൻ സർക്കാർ മുന്നോട്ടുവെച്ചത്. ഫ്ലാറ്റ് പൊളിക്കുകയല്ല, മറിച്ച് തകരാറുകൾ ശാശ്വതമായി പരിഹരിക്കുകയാണ് വേണ്ടത്. നിർമ്മാണ പ്രവർത്തനങ്ങളിൽ യഥാർത്ഥത്തിൽ എന്തെങ്കിലും വീഴ്ചകൾ പറ്റിയിട്ടുണ്ടെങ്കിൽ അതിന് ഉത്തരവാദികളായവർക്കെതിരെ കർശന നടപടി സ്വീകരിക്കണമെന്നും കെ.ജെ. മാക്സി ആവശ്യപ്പെട്ടു.
അതേസമയം, മുണ്ടംവേലി ലൈഫ് മിഷൻ ഫ്ലാറ്റ് നിർമ്മാണത്തിൽ വലിയ തോതിലുള്ള അഴിമതിയാണ് നടന്നിട്ടുള്ളതെന്ന് മുഹമ്മദ് ഷിയാസ് എംഎൽഎ ആരോപിച്ചു. കെട്ടിടത്തിന് ബലക്ഷയമുണ്ടെന്ന് മദ്രാസ് ഐഐടിയുടെ പഠനത്തിൽ കണ്ടെത്തിയിട്ടുണ്ട്. 17 കോടി രൂപ ചെലവിൽ നിർമ്മിച്ച ഫ്ലാറ്റിന്റെ അറ്റകുറ്റപ്പണികൾക്കായി മാത്രം 28 കോടി രൂപ ചെലവഴിച്ചെന്നും, സംഭവത്തിൽ സമഗ്രമായ വിജിലൻസ് അന്വേഷണം ഉണ്ടാകുമെന്നും മുഹമ്മദ് ഷിയാസ് വ്യക്തമാക്കി.
