തൊടുപുഴ: എൻഎസ്എസ് ജനറൽ സെക്രട്ടറി ജി. സുകുമാരൻ നായർക്കെതിരെ ആഞ്ഞടിച്ച് മുൻ മന്ത്രി കെ.ബി. ഗണേഷ് കുമാർ. എൻഎസ്എസിനെ ഭീരുവിന്റെയും ദുഷ്ടന്റെയും പിടിയിൽനിന്ന് മോചിപ്പിക്കേണ്ടതുണ്ടെന്നും അതിനായുള്ള പോരാട്ടത്തിന് ഹൈറേഞ്ച് എൻഎസ്എസ് യൂണിയൻ തുടക്കമിട്ടുകഴിഞ്ഞുവെന്നും അദ്ദേഹം വ്യക്തമാക്കി. ഈ മുന്നേറ്റം കേരളമാകെ പടരുമെന്നും ചെറിയ ആനുകൂല്യങ്ങൾ കണ്ട് നായർ സമുദായം വീണുപോകരുതെന്നും അദ്ദേഹം ഓർമ്മിപ്പിച്ചു. വണ്ടൻമേട് എൻഎസ്എസ് കരയോഗത്തിന്റെ രജതജൂബിലി സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു ഗണേഷ് കുമാർ.

നായർ സർവീസ് സൊസൈറ്റി എന്നത് ഇന്ന് 'മക്കൾ സർവീസ് സൊസൈറ്റി' അഥവാ എംഎസ്എസ് ആയി മാറിയെന്ന് ഗണേഷ് കുമാർ കുറ്റപ്പെടുത്തി. ജനറൽ സെക്രട്ടറിയുടെ സ്വന്തം മക്കളുടെ താല്പര്യങ്ങൾക്ക് വേണ്ടിയാണ് സംഘടന പ്രവർത്തിക്കുന്നത്. കോളേജ് പ്രൊഫസറാകാൻ ആവശ്യമായ യോഗ്യത പോലുമില്ലാത്ത സുകുമാരൻ നായരുടെ മകളാണ് ഇന്ന് എൻഎസ്എസ് കോളേജുകളുടെ നിയന്ത്രണം കയ്യാളുന്നത്. വ്യാജ സർട്ടിഫിക്കറ്റ് ഹാജരാക്കിയതിന് ധനലക്ഷ്മി ബാങ്കിൽനിന്ന് സ്വന്തം ബന്ധുവിനെ പിരിച്ചുവിട്ടതിലുള്ള വിരോധത്തിലാണ് ബാങ്കിലെ നിക്ഷേപങ്ങൾ ഒറ്റ ദിവസം കൊണ്ട് പിൻവലിക്കാൻ കരയോഗങ്ങൾക്ക് അദ്ദേഹം നിർദ്ദേശം നൽകിയത്. മകളുടെ മകന് തൊഴിൽ നേടിക്കൊടുക്കുന്നതിനായി വിദ്യാഭ്യാസ മന്ത്രിയെ പൊന്നാടയണിയിച്ച് സ്വീകരിച്ചപ്പോൾ, രമേശ് ചെന്നിത്തലയ്ക്ക് അത്തരമൊരു സ്വീകരണം നൽകിയില്ലെന്നും ഗണേഷ് കുമാർ പറഞ്ഞു.

കൂടെ നിൽക്കുന്നവരുടെ കഴുത്തിന് കത്തിവെക്കുന്ന സമീപനമാണ് നിലവിലെ നേതൃത്വത്തിന്റേത്. 2024-ൽ ജനറൽ സെക്രട്ടറി പുറത്തിറക്കിയ സർക്കുലറിൽ വിവാദ പരാമർശങ്ങളാണുള്ളതെന്ന് വി.ഡി. സതീശൻ ചൂണ്ടിക്കാണിച്ചിരുന്നു. സ്ത്രീകൾ കള്ളികളാണെന്നും മോഷണം നടത്തുമെന്നും അതിനാൽ മൂന്ന് വർഷത്തിലധികം അവരെ ഒരു പദവിയിലും ഇരുത്തരുതെന്നുമാണ് ഒരു ജനറൽ സെക്രട്ടറി സർക്കുലറിലൂടെ എഴുതിവിട്ടതെന്ന് ഗണേഷ് കുമാർ ആരോപിച്ചു. സുകുമാരൻ നായർക്ക് മുസ്ലിം ജനവിഭാഗത്തോട് മമതയില്ലെന്നും മുസ്ലിം ലീഗിന്റെ വിദ്യാഭ്യാസ മന്ത്രിയോട് മാത്രമാണ് താല്പര്യമെന്നും അദ്ദേഹം വിമർശിച്ചു. നിസ്സാര ലാഭങ്ങൾക്കായി ജോലി വാങ്ങാൻ ആരും പോകരുതെന്നും സ്വന്തം ഭാര്യയ്ക്കും മക്കൾക്കും ജോലി തരപ്പെടുത്തി ആളുകളെ അടിമകളാക്കി മാറ്റുകയാണ് സുകുമാരൻ നായരെന്നും അദ്ദേഹം ആരോപിച്ചു. അമൃതാനന്ദമയി ദേവിയെ ജാതി പറഞ്ഞ് ആക്ഷേപിച്ച സുകുമാരൻ നായരുടെ കൊച്ചുമകനാണ് ഇന്ന് അവരുടെ കോളേജിൽ പഠിക്കുന്നത്; കോഴ്സ് പാസായാൽ പാലക്കാട് എൻജിനീയറിങ് കോളേജിൽ ജോലി ലഭിക്കുമെന്നും അദ്ദേഹം ചൂണ്ടിക്കാട്ടി.

'ഗോഡ്ഫാദർ' സിനിമയിലെ അഞ്ഞൂറാനെപ്പോലെയാണ് സുകുമാരൻ നായരെന്ന് ഗണേഷ് കുമാർ പരിഹസിച്ചു. ചാരു കസേരയിൽ കിടന്ന് കരയോഗം സെക്രട്ടറിമാരെ താഴെയിരുത്തി കാര്യങ്ങൾ ചെയ്യിക്കുന്ന രീതിയാണത്. പത്താം ക്ലാസ് പോലും വിജയിക്കാതെ ഏത് ഉന്നത സ്ഥാനത്തും ഇരിക്കാമെന്ന് തെളിയിച്ച ആളാണ് അദ്ദേഹം. നയാര പമ്പിനെ നായർ പമ്പ് എന്ന് തെറ്റായി വായിക്കുന്ന ജനറൽ സെക്രട്ടറിയാണ് ഇപ്പോഴുള്ളതെന്നും, തങ്ങളുടെ അനുവാദമില്ലാതെ നായർ എന്ന് പേരിട്ട പമ്പിൽനിന്ന് ഇന്ധനം അടിക്കരുതെന്ന് ഇദ്ദേഹം പറഞ്ഞുകളയുമെന്നും പരിഹസിച്ചു.

എൻഎസ്എസ് തിരഞ്ഞെടുപ്പിൽ ഔദ്യോഗിക പാനലിനെ പരാജയപ്പെടുത്താൻ സമുദായംഗങ്ങൾ തയ്യാറാകണമെന്ന് ഗണേഷ് കുമാർ ആഹ്വാനം ചെയ്തു. വ്യക്തിപരമായ പദവികൾ കാംക്ഷിച്ചല്ല താൻ സംസാരിക്കുന്നത്. മന്നത്ത് പത്മനാഭൻ ആചാര്യന്റെ സമാധി മണ്ഡപത്തിൽ ആരോ ചെരുപ്പിട്ട് കയറിയെന്ന് കാരണം പറഞ്ഞ് അത് പൂട്ടിയിട്ടിരിക്കുകയാണ്; ആചാര്യന്റെ മണ്ഡപം പൊതുജനങ്ങൾക്കായി തുറന്നുകൊടുക്കണം. സുകുമാരൻ നായർക്ക് പണ്ടൊക്കെ എന്തിനും ഏതിനും തല ചൊറിച്ചിലായിരുന്നു, ഇപ്പോൾ ആരോ പേൻ മരുന്ന് വാങ്ങി നൽകിയതിനാൽ അത് മാറിയിട്ടുണ്ടെന്നും പരിഹസിച്ചു. തനിക്കെതിരെ പ്രമേയം പാസാക്കി ഭയപ്പെടുത്താൻ നോക്കേണ്ടതില്ലെന്നും ഒരു ആവശ്യത്തിനും താൻ സുകുമാരൻ നായരുടെ മുന്നിൽ പോയിട്ടില്ലെന്നും വ്യക്തമാക്കിയ ഗണേഷ് കുമാർ, ആരും സംഘടന ഉപേക്ഷിച്ചു പോകരുതെന്നും ഉള്ളിൽനിന്ന് പോരാടണമെന്നും ഓർമ്മിപ്പിച്ചു.