തിരുവനന്തപുരം: പുകപരിശോധന നടത്താൻ വേണ്ടി മാത്രമായി കെഎസ്ആർടിസി ബസ് ഇരുന്നൂറ് കിലോമീറ്ററോളം ദൂരം സഞ്ചരിച്ച സംഭവത്തിൽ സിഎംഡി സമഗ്ര അന്വേഷണത്തിന് നിർദ്ദേശം നൽകി. വിഷയത്തിൽ മെക്കാനിക്കൽ വിഭാഗത്തിൽ നിന്ന് വിശദമായ റിപ്പോർട്ട് ആവശ്യപ്പെട്ടിട്ടുണ്ട്. പുക പരിശോധിക്കുന്നതിനായി പത്തനംതിട്ടയിൽ നിന്നുള്ള പ്രിയദർശിനി ബസ് തലസ്ഥാനത്ത് എത്തിയ വിവരം ട്വന്റിഫോറാണ് പുറത്തുകൊണ്ടുവന്നത്. സംഭവത്തിൽ ഉദ്യോഗസ്ഥരുടെ ഭാഗത്തുനിന്ന് എന്തെങ്കിലും വീഴ്ചകൾ ഉണ്ടായിട്ടുണ്ടോ എന്ന് കർശനമായി പരിശോധിക്കുമെന്ന് സിഎംഡി വ്യക്തമാക്കി.
വെറും 500 രൂപ ലാഭിക്കുന്നതിനായുള്ള ഈ യാത്രയ്ക്ക് കോർപ്പറേഷന് നഷ്ടമായത് പതിനായിരത്തിലധികം രൂപയാണ്. പത്തനംതിട്ട ഡിപ്പോയിലെ RNE 654 എന്ന രജിസ്ട്രേഷൻ നമ്പറിലുള്ള ബസാണ് പുക പരിശോധനയ്ക്കായി വികാസ് ഭവനിലെത്തിയത്. പരിശോധനകൾ പൂർത്തിയാക്കിയ ശേഷം വാഹനം വീണ്ടും പത്തനംതിട്ടയിലേക്ക് തിരിച്ചുപോയി. തലസ്ഥാനത്തേക്കും പിന്നീട് തിരിച്ചുമായി ഏകദേശം 200 കിലോമീറ്ററോളം യാത്രക്കാരെ ആരെയും കയറ്റാതെ 'ഡെഡ് ഡ്യൂട്ടി' ആയാണ് ബസ് ഓടിച്ചത്. സ്വകാര്യ സ്ഥാപനങ്ങളിൽ പോയി പുകപരിശോധന നടത്താൻ അനുമതി നിലനിൽക്കുമ്പോഴാണ് ഇത്രയും അധികച്ചെലവ് വരുത്തി ബസ് പത്തനംതിട്ടയിൽ നിന്ന് തിരുവനന്തപുരത്തേക്ക് അയച്ചത്.
സ്വകാര്യ കേന്ദ്രങ്ങളിൽ 500 രൂപയിൽ താഴെ ചെലവിൽ ചെയ്യാവുന്ന പരിശോധനയ്ക്കായി ഇന്ധനച്ചെലവും ഡ്രൈവറുടെ വേതനവുമടക്കം പതിനായിരത്തിലേറെ രൂപയാണ് കെഎസ്ആർടിസിക്ക് ചെലവായത്. പത്തനംതിട്ട ജില്ലയിൽ കെഎസ്ആർടിസിക്ക് സ്വന്തമായി പുകപരിശോധനാ സംവിധാനമില്ലാത്തതാണ് ഈ ദീർഘദൂര യാത്രയ്ക്ക് വഴിവെച്ചതെന്നാണ് റിപ്പോർട്ട്. പതിവായി പതിനായിരങ്ങൾ ചെലവഴിച്ച് ബസുകൾ പുക പരിശോധിക്കാൻ തിരുവനന്തപുരത്തേക്ക് അയക്കാറുണ്ടെന്നാണ് അധികൃതർ നൽകുന്ന മറുപടി. കൂടാതെ, സിഎഫ് ടെസ്റ്റ് പാസാകാത്ത വാഹനമായതുകൊണ്ടാണ് യാത്രക്കാരെ കയറ്റാതെ സർവീസ് നടത്തിയതെന്നും പത്തനംതിട്ട ഡിപ്പോ അധികൃതർ അറിയിച്ചു.
