തിരുവനന്തപുരം: സംസ്ഥാനത്തെ എയ്ഡഡ് സ്കൂളുകളിലെ അധ്യാപക, അനധ്യാപക ജീവനക്കാരുടെ നിയമനങ്ങൾക്ക് പോലീസ് വെരിഫിക്കേഷൻ നിർബന്ധമാക്കി പൊതുവിദ്യാഭ്യാസ വകുപ്പ് ഉത്തരവിറക്കി. ക്രിമിനൽ കേസുകളിൽ ഉൾപ്പെട്ട വ്യക്തികൾ സർവീസിൽ കടന്നുകൂടുന്നത് പൂർണ്ണമായി തടയുക എന്ന ലക്ഷ്യത്തോടെയാണ് ഈ സുപ്രധാന തീരുമാനം. ഇതുസംബന്ധിച്ച ഔദ്യോഗിക ഉത്തരവ് വിദ്യാഭ്യാസ വകുപ്പ് പുറത്തിറക്കിക്കഴിഞ്ഞു.
നേരത്തെ ആഭ്യന്തര വകുപ്പ് സമാനമായ നിർദ്ദേശം മറ്റ് മേഖലകളിൽ നടപ്പിലാക്കിയിരുന്നു. സഹകരണ സ്ഥാപനങ്ങൾ, പൊതുമേഖലാ സ്ഥാപനങ്ങൾ, ക്ഷേമനിധി ബോർഡുകൾ തുടങ്ങിയവയിൽ ജോലിയിൽ പ്രവേശിച്ച് ഒരു മാസത്തിനകം പോലീസ് വെരിഫിക്കേഷൻ പൂർത്തിയാക്കണമെന്നായിരുന്നു ആഭ്യന്തര വകുപ്പിന്റെ ചട്ടം. ഈ വ്യവസ്ഥയുടെ തുടർച്ചയായാണ് വിദ്യാഭ്യാസ വകുപ്പും പുതിയ തീരുമാനം കൈക്കൊണ്ടിരിക്കുന്നത്.
എയ്ഡഡ് സ്കൂൾ ജീവനക്കാരുടെ നിയമനാംഗീകാരത്തിനായി സമർപ്പിക്കുന്ന അപേക്ഷകൾക്കൊപ്പം പോലീസ് വെരിഫിക്കേഷൻ പെർഫോമ കൂടി ഉൾപ്പെടുത്തണമെന്ന് പുതിയ ഉത്തരവിൽ നിഷ്കർഷിക്കുന്നുണ്ട്. സമർപ്പിക്കുന്ന പെർഫോമ മുൻനിർത്തി നിയമനാംഗീകാരം നൽകേണ്ട ഉദ്യോഗസ്ഥർ ബന്ധപ്പെട്ട പോലീസ് അധികാരികളിൽനിന്ന് കൃത്യമായ വെരിഫിക്കേഷൻ റിപ്പോർട്ട് തേടേണ്ടതുണ്ട്. ഈ റിപ്പോർട്ട് വിശദമായി പരിശോധിച്ച ശേഷം മാത്രമേ നിയമനങ്ങൾക്ക് അന്തിമ അംഗീകാരം നൽകാൻ പാടുള്ളൂ എന്നും ഉത്തരവിൽ വ്യക്തമാക്കുന്നു. ഇതിന്റെ ഭാഗമായി കേരള വിദ്യാഭ്യാസ ചട്ടങ്ങളിൽ (കെഇആർ) ആവശ്യമായ ഭേദഗതികൾ വരുത്തുമെന്നും വിദ്യാഭ്യാസ വകുപ്പ് അറിയിച്ചു.
